کراچی۔ 07 جون (اے پی پی):الیکشن کمیشن آف پاکستان نے 15 جون کوہونےوالےمیئر،ڈپٹی میئر،چیئرمین،وائس چیئرمین سمیت تمام کونسلز کے ہیڈ کے انتخابات کے لیے حکم نامہ جاری کردیا۔ جاری حکم نامے کے مطابق صوبائی الیکشن کمشنر سندھ کی جانب سے بدھ کو جاری اعلامیہ کے مطابق حکم نامہ میں کہا گیا ہے کہ سندھ بھر کے تمام منتخب بلدیاتی منتخب نمائندوں کو ووٹ دینے کا حق دیا جائے، 15جون کو تمام گرفتار منتخب نمائندوں کی ہیڈ آف کونسلز کے انتخابات میں حاضری کو یقینی بنایا جائے،
تمام گرفتار منتخب بلدیاتی نمائندوں کو پروڈکشن آرڈر کے تحت ووٹ ڈالنے کے لئے حاضر کیا جائے۔ صوبائی الیکشن کمشنر سندھ اعجاز انور چوہان کی جانب سے چیف سیکرٹری کو لکھے گئے خط میں کہا گیا ہے کہ چیف سیکرٹری سندھ تمام منتخب نمائندوں کی حاضری الیکشن کے روز یقینی بنائیں،صاف اور شفاف الیکشن کے لیے تمام منتخب نمائندوں کی موجودگی کے انتظامات کیے جائیں اور الیکشن کمیشن کے حکم کی مکمل پاسداری کی جائے۔
Short Link: https://urdu.app.com.pk/urdu/?p=367285
