لاہور۔4نومبر (اے پی پی):وزیر تعلیم رانا سکندر حیات کی زیر صدارت محکمہ لٹریسی کا اجلاس منعقد ہوا، جس میں سیکرٹری لٹریسی سید حیدر اقبال،ڈی جی لٹریسی ڈاکٹر خرم شہزاد اور وزیر تعلیم نے شرکت کی۔اجلاس میں نان فارمل سکولوں کی استعداد کار بڑھانے سمیت دیگر متعلقہ امور پر تبادلہ خیال کیا گیا۔اجلاس میں وزیر تعلیم نے ہدایت کی کہ کم شرح تعلیم والے ایریاز کو ٹارگٹ کر کے موثر حکمت عملی بنائی جائے اور 2030 تک آئوٹ آف سکول چلڈرن کی تعداد زیرو کرتے ہوئے لٹریسی ریٹ100 فیصد پر لایا جائے۔
انہوں نے کہا کہ نان فارمل سکولوں کو جلد ٹیبلٹس بھی دیئے جا رہے ہیں۔ وزیر تعلیم کو بتایا گیا کہ470 نان فارمل لٹریسی سنٹرز میں سکلز پروگرام چل رہا ہے۔رانا سکندر حیات نے اس اقدام کی تحسین کرتے ہوئے سکلز ایجوکیشن کا دائرہ کار بڑھانے کی بھی ہدایت کی۔سیکرٹری لٹریسی نے بتایا کہ اڈلٹ لٹریسی کیلئے خصوصی ایپ بھی بنائی جا رہی ہے جسے بالغ افراد آن لائن استعمال کر کے تعلیم حاصل کر سکتے ہیں۔اس ضمن میں ایپ کیلئے سیلولر کمپنی سے ڈیٹا بھی لے کر دیا جائے گا۔رانا سکندر حیات نے ایپ کی جلد از جلد لانچنگ اور اس کی بھرپور تشہیر کی بھی ہدایت کی۔
اس موقع پر لٹریسی سنٹرز کے اساتذہ کیلئے خصوصی ٹریننگ کیلئے لائحہ عمل بھی مرتب کیا گیا۔وزیر تعلیم نے لٹریسی سنٹرز ماہانہ بنیادوں پر تھیم بنانے کی بھی ہدایت کی۔
