لاہور۔6اپریل (اے پی پی):وزیر اطلاعات پنجاب عظمی بخاری نے کہا ہے کہ تھیٹر مالکان کی جانب سے مکمل گارنٹی کے باوجود بعض مقامات پر ایس او پیز کی خلاف ورزی کی گئی، جس پر صرف ان عناصر کے خلاف کارروائی ہو رہی ہے جو قواعد کی پاسداری نہیں کر رہے۔
عظمی بخاری نے کہا کہ ان کا مشن تھیٹرز سے فحاشی اور بیہودگی کا مکمل خاتمہ ہے، تھیٹرز کا ماحول ایسا ہونا چاہیے جہاں فیملیز بلا خوف و خطر ڈرامے دیکھنے آئیں،ہم نے تھیٹر مالکان وفنکاروں کو اصلاح کے لیے ایک سال کا وقت دیا تھا اوراس دوران تمام فریقین نے تھیٹرز کو فیملی انٹرٹینمنٹ کا مرکز بنانے کی تحریری گارنٹی دی تھی۔وزیر اطلاعات نے مزید کہا کہ حکومت صرف انہی افراد کے خلاف کارروائی کر رہی ہے جنہوں نے دی گئی یقین دہانیوں کے باوجود ایس او پیز کی خلاف ورزی کی۔
انہوں نے دوٹوک موقف اختیار کرتے ہوئے کہا کہ نہ کسی کی دھمکیوں کی پرواہ ہے اور نہ ہی کسی سے بلیک میل ہوں گی۔عظمی بخاری نے یہ بھی اعلان کیا کہ تھیٹر سے بے حیائی کے خاتمے کے حوالے سے جلد نئی قانون سازی کی جا رہی ہے ،آئندہ چند روز میں ایک جامع تھیٹر پالیسی متعارف کروا دی جائے گی۔ انہوں نے عوام کے مثبت ردعمل کو حوصلہ افزا قرار دیتے ہوئے کہا کہ عوام بھی چاہتے ہیں کہ تھیٹر ایک صاف ستھرا اور معیاری تفریحی ذریعہ بنے، تھیٹر کی بہتری کے لیے کیے جانے والے اقدامات کا مقصد ایک صحت مند تفریحی ماحول فراہم کرنا ہےاور عوام کی حمایت ہماری حوصلہ افزائی کر رہی ہے۔
Short Link: https://urdu.app.com.pk/urdu/?p=578893
