اسلام آباد ۔ 6 مارچ (اے پی پی) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ تین دہائیوں تک قوم پر مسلط رہنے والے آج اپنی ناکامیاں قبول کررہے ہیں’ سابق وزیراعظم شاہد خاقان عباسی کا بیان اعتراف جرم ہے’ پاکستان کے عوام دو خاندانوں کے موروثی وسیاسی ماڈل سے بیزار ہیں، عوام نے عمران خان کو وزیراعظم منتخب کرکے نیا راستہ تلاش کرلیا ہے۔ ان خیالات کا اظہار انہوں نے جمعہ کو سابق وزیر اعظم شاہد خاقان عباسی کے بیان کے بعد جاری اپنے ایک ٹویٹ میں کیا جس میں انہوں نے کہا تھا کہ ”ماضی کے ماڈل ملکی مسائل حل نہ کرسکے نئے راستے تلاش کرنے کی ضرورت ہے”۔ ڈاکٹر فردوس عاشق اعوان نے کہا کہ شاہد خاقان عباسی کا یہ بیان دراصل اعتراف جرم ہے۔ انہوں نے کہا کہ تین دہائیوں سے قوم پر مسلط رہنے والے آج قوم کے سامنے اپنی ناکامیوں کو قبول رہے ہیں۔ وزیراعظم کی معاون خصوصی برائے اطلاعات و نشریات نے کہا کہ پاکستان کے عوام عمران خان کو وزیراعظم منتخب کرکے نیا راستہ تلاش کرچکے ہیں، پاکستان کے عوام دو خاندانوں کے موروثی سیاسی ماڈل سے بیزار ہیں، عوام کی دہائی ہے کہ اب یہ ان پر دوبارہ مسلط نہ ہوں۔ انہوں نے کہا کہ آج جمہوریت کی باتیں کرنے والے اپنے دور میں آئینی ترمیم کرکے بادشاہ سلامت بننے کی کوشش کرتے رہے ۔ ڈاکٹر فردوس عاشق اعوان نے کہا کہ ”کمپنی سیاست” میں تمام شیئرز خاندان ہی کے پاس رہتے ہیں، ان کی جمہوریت یہ تھی کہ بڑا بھائی خود وزیراعظم، چھوٹا وزیراعلی، بھتیجا سب سے بڑے صوبے کا مختاراعلی بنا رہے جبکہ صاحبزادی ”سوپر وزیراعظم” کا درجہ رکھتی تھیں’ عمران خان عوام کے وہ مقبول رہنما ہے جنھوں نے حقیقی عوامی راج قائم کیا۔ انہوں نے کہا کہ وزیراعظم کل کراچی جائیں گے جہاں وہ عوامی منصوبوں کا افتتاح کریں گے اور کراچی کے مسائل کے حل کے لیے طے کردہ ترجیحات کا جائزہ لیں گے۔
