تیونس سٹی ۔ 15 جولائی (اے پی پی) تیونس کی سمندری حدود میں تارکین وطن کی کشتی ڈوبنے سے ہلاک ہونے والے مہاجرین کی تعداد 82 ہوگئی ہے ، ریڈ کراس کے حکام کا کہنا ہے کہ انھیں نعشیں سمندر سے نکالنے میں ایک ہفتہ لگا۔غیرملکی خبررساں ادارے کے مطابق جاں بحق ہونے والے تما م افراد غیر قانونی طور پر لیبیا سے یورپ جا رہے تھے کہ تیز سمندری لہروں کی وجہ سے ان کی کشتی حادثے کا شکار ہوگئی جس کی اطلاع ملنے پر ریڈ کراس کی جانب سے ریسکیو آپریشن شروع کیا گیا تھا۔حادثے کے فوراً بعد تیونس کے ماہی گیروں نے چار افراد کو بچالیا جنہوں نے بتایا کہ ا±ن سمیت کشتی میں مجموعی طور پر 86 افراد سوار تھے جو لیبیا سے یورپ جانے کی کوشش کر رہے تھے۔ریڈ کراس کے افسر مونگی سلیم نے غیرملکی خبر رساں ادارےسے بات کرتے ہوئے بتایا کہ کہ ایک ہفتے کے سرچ آپریشن کے بعد ڈوبنے والے تمام (82 ) افراد کی لاشیں تلاش کرلی گئی ہیں۔یاد رہے کہ لیبیا کا مغربی ساحل افریقی مہاجرین کی یورپ جانے کے لیے مرکزی راہداری ہے جہاں اکثر کشتیاں ڈوبنے کے واقعات پیش آتے ہیں۔
