اسلام آباد۔29اگست (اے پی پی):جاپان کی وزارت خارجہ نے لاہور فلورٹیج سوگیٹسو سٹڈی گروپ کی چیئرپرسن نوین سید کو جاپان اور پاکستان کے درمیان ثقافتی تعلقات کے فروغ میں نمایاں خدمات کے اعتراف میں جاپانی وزیر خارجہ کی طرف سے کامنڈیشن ایوارڈ 2025 دینے کا اعلان کیا ہے جمعہ کو پاکستان میں جاپان کے سفیر اکاماتسو سوچی نے کہا کہ نوین سید کو اس سال جاپانی وزیر خارجہ کی طرف سے کامنڈیشن ایوارڈ ملنے پر دلی مبارکباد پیش کرتے ہیں ۔
انہوں نے اس توقع کا اظہار کیا کہ نوین سید پاکستان میں جاپانی پھولوں کی تزئین و آرائش کے روایتی فن اکیبانہ کے فروغ میں اہم کردار ادا کرتی رہی ہیں اور دونوں ممالک کے درمیان دوستی اور خیر سگالی کے پل کا کام کرتی رہی ہیں۔
لاہور فلورٹیج سوگیٹسو سٹڈی گروپ ایک ثقافتی تنظیم ہے جو پاکستان میں جاپانی طرز میں پھولوں کی آرائش کے فن اکیبانہ کی ترویج کے لئے کام کرتی ہے ۔لاہور فلورٹیج سوگیٹسو سٹڈی گروپ کی چیئرپرسن نوین سید پاکستان میں اکیبانہ ورکشاپ ،کلاسز اور نمائشوں کے انعقاد کے ذریعے جاپانی ثقافت کو پاکستانیوں کو متعارف کرانے کے لئے بے لوث اور پوری لگن کے ساتھ کام کر رہی ہیں۔
