اسلام آباد۔16فروری (اے پی پی):چیف آف آرمی سٹاف جنرل سید عاصم منیر نے کہا ہے کہ جب تک قوم اور بالخصوص نوجوان پاک فوج کے پیچھے کھڑے ہیں تو ان شا اللہ پاک فوج کو کوئی کبھی شکست نہیں دے سکے گا، لڑتے وقت پختون ، بلوچی یا پٹھان کی کوئی تفریق نہیں ہوتی بلکہ ہم سب ساتھیوں کی طرح لڑتے ہیں کیونکہ ہمارے لئے پاکستانیت ہی سب کچھ ہے، خارجی اسلام کی غلط تشریح کر رہے ہیں جو اسلام میں جائز نہیں، پاک فوج فتنہ الخوارج کے خلاف لڑ رہی ہے ، قرآن پاک میں بھی اللہ اور اس کے رسول ﷺ سے جنگ کرنے والوں کے خلاف جہاد کا حکم دیا گیا ہے، ان کے بارے میں آخرت میں بھی سخت عذاب کی وعید ہے، اسلام دنیا کا واحد اور پہلا مذہب ہے جس نے عورت کو عزت واحترام دی، عورت کی عزت وتکریم کو کوئی نہیں چھین سکتا، اس طرح کے کسی گمراہ گروہ کو پاکستان پر اپنی اقدار مسلط کرنے کی اجازت نہیں دیں گے۔ان خیالات کا اظہار انہوں نے طلبا سے خصوصی گفتگو کرتے ہوئےکیا۔
انہوں نے کہا کہ ملک کے نوجوانوں سے گفتگو ہمیشہ انتہائی خوشی کی بات ہے، ہم جب بھی آپ سے گفتگو کرتے ہیں تو یہ اس حقیقت کی غمازی ہے کہ مستقبل محفوظ ہاتھوں میں ہے۔ انہوں نے کہا کہ جب تک قوم پاک فوج کے پیچھے کھڑی ہے خصوصاً نوجوان پاک فوج کے پیچھے کھڑے ہیں اور جب تک ہمارے اندر قربانی کا یہ جذبہ موجود ہے تو ان شا اللہ پاک فوج کو کوئی کبھی شکست نہیں دے سکے گا۔آرمی چیف نے کہا کہ ہم کامریڈز کی طرح لڑتے ہیں اور جب ہم لڑ رہے ہوتے ہیں تو ہمیں کوئی پتہ نہیں ہوتا کہ کون پختون ہے، کون بلوچی اور کون پٹھان ہے۔ جنرل سید عاصم منیر نے کہا ہے کہ ہم بس کامریڈز اور ساتھیوں کی طرح لڑتے ہیں۔ انہوں نے کہا کہ ہمارے لئے پاکستانیت ہی سب کچھ ہے کہ ہم سب پاکستانی ہیں اور ہم پاکستان سے محبت کرتے ہیں۔
انہوں نے کہا کہ پاک فوج آج کل فسادیوں ، فتنہ الخوارج کے ساتھ لڑ رہی ہے ۔انہوں نے کہا کہ فسادی جہاد نہیں کر رہے ہیں بلکہ یہ خارجی ہیں جو دین سے دور ہیں ، ان کے پاس اسلام کی اپنی غلط تشریح ہے جو اسلام میں جائز نہیں ہے۔ آرمی چیف نے کہا کہ ان کے بارے میں اللہ تعالیٰ کے احکامات یہ ہیں کہ ’’ جو اللہ اور رسولﷺ سے جنگ کرتے ہیں ، اور زمین پر فساد برپا کرتے ہیں ، ان کوقتل کر دو‘‘۔ انہوں نے قرآن پاک کی آیات کا حوالہ دیتے ہوئے کہا کہ قرآن مجید میں فرمایا گیا ہے کہ’’ ان کو پھانسی پر لٹکا دو ، یا مختلف سمتوں سے ان کے ہاتھ پائوں کاٹ دو، یا اپنی زمین سے ان کو دربدر کردو، یہ ان کے لئے دنیا کے اندر سزا ہے اور آخرت میں ان کو بڑا عذاب دیا جائے گا‘‘۔
انہوں نے قرآن پاک کی آیت کا حوالہ دیتے ہوئے کہا کہ جو اس سے بچنا چاہتے ہیں ان کےلئے اللہ تعالیٰ نے صرف ایک گنجائش رکھی ہے ’’ اس سے پہلے کہ تم ان کو پکڑ لو ،اس سے پہلے کہ وہ تائب ہو جائیں، آپ کے سامنے تسلیم کر لیں ، تو پھر ان کو پتا ہونا چاہئے کہ اللہ تعالیٰ بہت غفور ورحیم ہے‘‘۔ جنرل سید عاصم منیر نے خوارج کو مخاطب کرتے ہوئے کہا کہ اپنے آپ کو ریاست کے سامنے سرنڈر کر دیں، تب وہ ریاست سے رحم کی توقع کر سکتے ہیں۔ انہوں نے کہا کہ اس بنیاد پر آرمی آج بھی ہر روز فتنہ الخوارج کے خلاف لڑ رہی ہے۔ انہوں نے کہا کہ ہم مذہب کی ان کی تشریح سے متفق نہیں ہیں۔
جنرل سید عاصم منیر نے مزید کہا کہ دنیا بھر میں اسلام وہ پہلا مذہب ہے جس نے عورت چاہے وہ ماں ہو ، یا بیوی ہو یا بہن ہو،کو عزت دی اور اس کی عزت واحترام کو بلند کیا ۔ انہوں نے کہا کہ عورت کو کسی بھی کردار میں زیادہ سے زیادہ عزت ہمارے مذہب نے دی ہے۔ انہوں نے مزید کہا کہ آج تم کون ہوتے ہو اسے چھیننے والے، تم کون ہو ، تمہیں یہ اختیار کس نے دیا ہے، اسے کوئی نہیں چھین سکتا۔ جنرل سید عاصم منیر نے کہا کہ ہم اس قسم کے گمراہ گروہ کو کبھی بھی اپنے ملک پر اپنی اقدار مسلط کرنے کی اجازت نہیں دیں گے۔
