کراچی۔ 10 اگست (اے پی پی):محکمہ کھیل سندھ کے زیراہتمام جشن آزادی کے عنوان سے منعقد ہ منی میراتھن ریس نشان پاکستان ساحل سمندر پر اختتام پذیر ہوئی، جس میں2ہزار سے زائد گرلز و بوائز نے حصہ لیا ۔اتوار کو جاری اعلامیہ کے مطابق منی مراتھن میں پہلی سے تیسری پوزیشن آنے والے ایتھلیٹس کو 25، 20اور 15ہزارروپے انعام دیا گیا جبکہ چوتھی سے 10ویں پوزیشن کے حامل مرد و خواتین کو بھی نقد انعامات سے نوازا گیا۔
خواتین کی میراتھن میں ماہ نور فاطمہ نے پہلی پوزیشن حاصل کی، دوسری پوزیشن قندیل سلطان نے پائی،کائنات خلیل نے تیسری پوزیشن حاصل کی،مردوں کی 10کلو میٹر کی منی مراتھن محمد سجاد نے جیت لی ،ساجد علی نے دوسری پوزیشن حاصل کی،رضا محمد نے تیسری پوزیشن اپنے نام کی۔ ترجمان نے کہا کہ اس موقع پر 35سو افراد میں شرٹس تقسیم کی گئیں جبکہ بڑی تعداد میں شہری میراتھن ریس دیکھنے کے لئے موجود تھے۔
اس موقع پر سیکریٹری کھیل منور علی مہیسر نے میراتھن کی سیکیورٹی فراہم کرنے پر رینجرز، ڈی ایچ اے، ٹریفک پولیس، سندھ پولیس اور ریسکیو 1122کا شکریہ ادا کیا۔اختتامی تقریب میں مہمان خصوصی سیکریٹری کھیل منور علی مہیسر،ایڈیشنل سیکریٹری اسد اسحاق، اسسٹنٹ ڈائریکٹر فرید علی، پریذیڈنٹ سندھ بینک محمد انوار شیخ، ڈپٹی سی ای او اسد شاہ، احمد علی راجپوت نے میراتھن ریس جیتنے والے گرلز و بوائز میں انعامات تقسیم کئے۔تقریب میں ڈسٹرکٹ اسپورٹس افسران اسماعیل شاہ، شکیل احمد، سنی پرویز اور محمد عثمان بھی شریک تھے۔
