اسلام آباد۔22اپریل (اے پی پی):وفاقی وزیر داخلہ محسن نقوی نے کہا ہے کہ جناح سکوائر انڈر پاس 35 روز میں مکمل ہو جائے گا، اس سے اسلام آباد ائیر پورٹ سے مری تک سگنل فری کوریڈور کی سہولت ملے گی۔ان خیالات کا اظہار انہوں نے منگل کو جناح سکوائر مری روڈ انڈر پاس پراجیکٹ کے دورے کے موقع پر اظہار خیال کے دوران کیا۔
وزیر داخلہ نے منصوبے پر جاری تعمیراتی کام کا جائزہ لیا،انہوں نے انڈر پاس کو ریکارڈ 35 روز میں مکمل کرنے اور سپیڈ کے ساتھ ساتھ معیار کو ہرصورت برقرار ر رکھنے کی ہدایت کی۔ انہوں نے شہریوں کی آمدورفت کےلئے متبادل راستے پر ٹریفک کی روانی برقرار رکھنے کی ہدایت بھی کی ۔
انہوں نے کہا کہ اسلام آباد ایئرپورٹ سے مری تک سگنل فری کوریڈور سے شہریوں کو آمدورفت میں بہت آسانی ہو گی، اس سے اسلام آباد میں ٹریفک جام رہنے کا برسوں پرانا مسئلہ حل اور سیاحوں کو مری پہنچنے میں آسانی ہو گی ،اس کے علاوہ یہ پراجیکٹ کشمیر چوک کے قریب ٹریفک رش کو کم کرنے میں بھی معاون ثابت ہو گا۔
محسن نقوی نے کہا کہ اس منصوبے سے شہر میں ٹریفک کے مجموعی نظام کو بہتر بنانے میں مدد کے ساتھ ساتھ وقت اور ایندھن کی بھی بچت ہو گی۔ چیئرمین سی ڈی اے محمد علی رندھاوا نے وزیر داخلہ کو بریفنگ دیتے ہوئے کہا کہ پراجیکٹ کے سٹرکچر اور روڈ نیٹ ورک پر کام تیزی سے جاری ہے، انشاءاللہ منصوبے کو مقررہ وقت میں مکمل کیا جائے گا۔
انہوں نے کہا کہ اس منصوبے میں 479 میٹر طویل انڈر پاس شامل ہے، اسے 3 ٹریفک لین کو ایڈجسٹ کرنے کے لیے ڈیزائن کیا گیا ہے۔ان کا کہنا تھا کہ ملحقہ پل کو چوڑا کرنا بھی اس منصوبے کا حصہ ہے، دونوں طرف 2 لین کا اضافہ اور منصوبے سے ملحقہ چار سلپ روڈز کو بھی کشادہ کیا جائے گا۔
Short Link: https://urdu.app.com.pk/urdu/?p=585665
