راولپنڈی۔ 10 مارچ (اے پی پی) چیف آف آرمی سٹاف جنرل قمر جاوید باجوہ نے مشرقی سرحد پر پنوں عاقل ڈویژن میں آپریشن ایریاز کا دورہ کیا۔ ہفتہ کو پاک فوج کے شعبہ تعلقات عامہ(آئی ایس پی آر) کے مطابق انہیں فوجی جوانوں کی آپریشنل تیاریوں کے بارے میں بریف کیا گیا۔انہوں نے فوجی جوانوں کی آپریشنل تیاری اور بلند حوصلے کو سراہا۔ اس سے قبل انہوں نے صالح پٹ میں آل پاکستان مہران شوٹنگ چمپئن شپ میں مہمان خصوصی کے طورپر شرکت کی اور سویلین نشانہ بازوں کی دلچسپی اور نشانہ بازی کے اعلیٰ معیار کو سراہا۔ قومی اسمبلی میں قائد خزب اختلاف سید خورشید احمد شاہ، کراچی کور کمانڈر لیفٹینٹ جنرل شاہد بیگ مرزا، جی او سی پنوں عاقل ڈویژن میجر جنرل ظفر اللہ خان اور دیگر سول عسکری حکام موجود تھے۔
