جنرل ہسپتال شعبہ ایمرجنسی میں کسی بھی ناگہانی صورتحال سے نمٹنے کیلئے ہیلتھ پروفیشنلز ہمہ وقت تیار ہیں، ایم ایس

لاہور۔11مئی (اے پی پی):لاہور جنرل ہسپتال شعبہ ایمرجنسی میں کسی بھی ناگہانی صورتحال سے بلا تعطل نمٹنے کیلئے 8آپریشن تھیٹرز کو جدید طبی آلات سے لیس کرنے کے ساتھ ساتھ وافر مقدار میں جان بچانے والی ادویات فراہم کر دی گئیں ہیں۔ ہیڈ آف ڈیپارٹمنٹ سرجری پی جی ایم آئی و ایل جی ایچ پروفیسر ڈاکٹر محمد فاروق افضل نے بتایا کہ شعبہ سرجری سمیت تمام شعبوں کے ہیلتھ پروفیشنلز مریضوں کی بہتر نگہداشت اور بروقت طبی امداد کی فراہمی کیلئے الرٹ ہیں۔

پروفیسر فاروق افضل نے کہا ہے کہ ہسپتال کے بلڈ بنک سمیت تمام ضروری اشیا فعال رکھی ہوئی ہیں، کسی بھی قسم کی ایمرجنسی کو ہینڈل کرنے کیلئے تیار ہیں۔ ایم ایس پروفیسر فریاد حسین نے کہا کہ پنجاب حکومت کے ایس او پیز کی روشنی اور پرنسپل پی جی ایم آئی پروفیسر الفرید ظفر کی زیر نگرانی مختلف ٹیمیں بھی تشکیل دی گئیں ہیں جو بوقت ضرورت تمام شعبوں سے کوآرڈینیشن کریں گی۔

انہو ں نے کہا کہ ایل جی ایچ پبلک سیکٹر میں واحد ہسپتال ہے جہاں 2 ویسکولرز سرجنز بھی دکھی انسانیت کا علاج کر رہے ہیں جبکہ ہسپتال میں قائم کنٹرول روم فون نمبر 04299268817پر 24گھنٹے انتظامی ڈاکٹر موجود ہوگا۔انہوں نے مزید بتایا کہ شعبہ حادثات میں 10بستروں پر مشتمل قائم سرجیکل آئی سی یو میں تربیت یافتہ ڈاکٹرز و نرسز رانڈ دی کلاک فرائض سر انجام دیں گی تاکہ تشویشناک حالت میں آنے والے مریضوں کا احسن انداز سے علاج معالجہ کیا جا سکے۔

Short Link: https://urdu.app.com.pk/urdu/?p=595560