
اسلام آباد۔24دسمبر (اے پی پی):وفاقی وزیر تعلیم شفقت محمود نے کہا ہے کہ 11 جنوری کو تعلیمی ادارے دوبارہ کھولنے کے حوالہ سے غور کے لئےصوبائی وزرائے تعلیم کانفرنس 4 جنوری کو طلب کرلی گئی ہے۔ جمعرات کو یہاں میڈیا سے گفتگو کرتے ہوئے شفقت محمود نے کہا کہ اجلاس میں صورتحال کا جائزہ لیکر کوئی فیصلہ کیا جائے گا۔ انہوں نے کہا کہ اجلاس میں بالخصوص کورونا کی صورتحال اور بچوں کی صحت کو مدنظر رکھ کوئی فیصلہ کریں گے، انہوں نے کہا کہ سکولوں کو کھولنے سے متعلق حتمی فیصلہ وزارت صحت کی رپورٹ کے بعد ہو گا، وزارت صحت کی رپورٹ کی سفارشات پر فیصلہ کریں گے کہ 11 جنوری کو تعلیمی ادارے کھولے جائیں گے یا نہیں۔ وزارت تعلیم نے ایک نوٹیفکیشن بھی جاری کیا ہے جس کے مطابق اجلاس میں مئی کے آخری ہفتے اور جون کے ابتدائی ایام میں ہونے والے بورڈ امتحانات کے حوالے سے بھی تبادلہ خیال ہوگا، اجلاس میں موسم سرما و گرما کی چھٹیوں میں کمی پر بھی غور ہوگا۔ اجلاس میں نیا تعلیمی سال 2020-21 اگست 2021 میں شروع کرنے پر بھی غور ہوگا، قومی تعلیمی پالیسی کے حوالے سے بھی اجلاس میں غور کیا جائے گا، 25 ویں بین الاصوبائی وزرائے تعلیم کانفرنس کا انعقاد بزریعہ ویڈیو لنک صبح 11.30 بجے ہوگا.بین الاصوبائی وزرائے تعلیم کا کانفرنس کی صدارت وفاقی وزیر تعلیم شفقت محمود کریں گے۔