لاہور۔25اکتوبر (اے پی پی):صوبائی وزیر بلدیات ذیشان رفیق نے کہا ہے کہ موسمیاتی تغیر روکنے کے لئے جنگلات اور زرعی اراضی کا تحفظ ضروری ہے۔
وزیراعلی پنجاب چاہتی ہیں کہ زرعی اراضی کا بغیر پلاننگ کمرشل استعمال ریگولرائز کیا جائے۔ان خیالات کا اظہار انہوں نے جمعہ کے روز سول سیکرٹریٹ میں ایک اجلاس کی صدارت کرتے ہوئے کیا۔سیکرٹری لوکل گورنمنٹ شکیل احمد میاں اور سپیشل سیکرٹری ارشد بیگ نے بھی اجلاس میں شرکت کی۔ اجلاس میں پنجاب سپیشیئل پلاننگ اتھارٹی بنانے کی تجاویز پر غور کیا گیا۔ مجوزہ اتھارٹی زرعی اراضی کے کمرشل استعمال کو ریگولرائز کرے گی۔
پراجیکٹ مینجمنٹ یونٹ کی جانب سے اجلاس کو پی ایس پی اے کے افعال کار پر بریفنگ دی گئی۔وزیر بلدیات نے کہا کہ مجوزہ پنجاب سپیشیئل پلاننگ اتھارٹی جدید ٹیکنالوجی کی مدد سے ہر ضلع میں اراضی کی مانیٹرنگ کرے گی۔ ترقیاتی منصوبوں کی منظوری سے پہلے پی ایس پی اے کا این او سی لازمی ہوگا۔ صوبائی وزیر نے وزیراعلی کی منظوری کے لئے پریذینٹیشن جلد تیار کرنے کی ہدایت کرتے ہوئے کہا کہ شہروں کے قریب زرعی زمینوں کی دستیابی مسلسل کم ہونا تشویشناک ہے۔
اس بات میں کوئی دوآرا نہیں کہ ماسٹر پلان کے بغیر اراضی کے کمرشل استعمال کے باعث مسائل پیدا ہوتے ہیں۔ ذیشان رفیق نے کہا کہ پنجاب حکومت پلاننگ سپورٹ سسٹم (پی ایس ایس) متعارف کرا رہی ہے جس سے بڑی حد تک مسائل حل ہوں گے۔ انہوں نے کہا کہ شہروں میں رہائشی زونز کے ساتھ ہیلتھ، ایجوکیشن، آئی ٹی اور اکنامک زونز بنائیں گے۔ انہوں نے کہا کہ مکمل پلاننگ کے ساتھ رہائشی سکیمیں بنانے میں کوئی حرج نہیں تاہم ماسٹر پلان کی منظوری کے بغیر سکیموں کی حوصلہ شکنی ضروری ہے۔
شہریوں کو معیاری رہائشی سہولیات کی فراہمی وزیراعلی مریم نواز شریف کی اولین ترجیحات میں شامل ہے۔ مجوزہ پی ایس پی اے کے قیام سے وزیراعلی کے ویژن پر عملدرآمد میں مدد ملے گی۔اجلاس کو بریفنگ میں بتایا گیا کہ پہلے مرحلے میں 10 اضلاع میں پلاننگ سپورٹ سسٹم پر کام مکمل ہو چکا ہے جبکہ دیگر 21 ضلعوں میں کام جاری ہے تاہم ایل ڈی اے کے تحت اضلاع اس پروگرام میں شامل نہیں۔
Short Link: https://urdu.app.com.pk/urdu/?p=516963
