جنگ کسی کے حق میں نہیں ،تمام مسائل کا حل مذاکرات سے نکل سکتا ہے،بنگلہ دیشی ہائی کمشنر

لاہور۔14مئی (اے پی پی):پاکستان میں بنگلہ دیش کے ہائی کمشنراقبال حسین نے لاہورپریس کلب کا دورہ کیا۔ لاہورپریس کلب کے صدر ارشد انصاری ، سینئر نائب صدر افضال طالب ، نائب صدر صائمہ نواز ،سیکرٹری زاہد عابد ، جوائنٹ سیکرٹری عمران شیخ ، ممبران گورننگ باڈی سید بدر سعید ، سرمد فرخ خواجہ، شاہدہ بٹ، الفت مغل اور سینئر صحافی سید صابر سعید شاہ نے معزز ممان کو کلب آمد پر خوش آمدید کہا۔ اس موقع پر میڈیا سے گفتگوکرتے ہوئےبنگلہ دیشی ہائی کمشنر اقبال حسین خان نے کہاکہ جنگ کسی کے حق میں نہیں ،تمام مسائل کا حل مذاکرات سے نکل سکتا ہے، پاکستان اور بھارت کے مابین بھی تصفیہ طلب معاملات مذاکرات سے حل ہونے چاہئیں، جنوبی ایشیامیں دنیا کی آبادی کا بڑاحصہ آباد ہے اور یہ علاقہ جنگ کا متحمل نہیں ہوسکتا۔انہوں نے کہاکہ پاکستان اور بنگلہ دیش میں نئے تعلقات کی شروعات ہورہی ہے

دونوں ممالک کی حکومتیں مثبت انداز میں باہمی تعلقات کو آگے بڑھا رہی ہیں، پاکستان اور بنگلہ دیش میں جلد براہ راست فضائی پروازیں بحال ہوجائیں گی جس کے لئے اعلی سطح پر بات چیت جاری ہے۔ اقبال حسین خان نے کہاکہ پاکستان اور بنگلہ دیش میں کھیلوں کے شعبے میں بھی تعلقات میں بہتری آرہی ہے اور بنگلہ دیش کرکٹ ٹیم رواں ماہ پاکستان کا دورہ کررہی ہے۔ انہوں نے کہاکہ دونوں ممالک کے صحافیوں کے درمیان رابطہ بڑھانے کے لئے بھی کوشاں ہیں تاکہ عوامی سطح پر رابطے بڑھ سکیں۔ لاہورپریس کلب کے صدر ارشد انصاری نے معزز مہمان کی کلب آمد پر شکریہ ادا کیا اور کہاکہ پاکستان اور بنگلہ دیشی عوام کے دل ایک ساتھ دھڑکتے ہیں اور اب ان تعلقات میں بہتری ہورہی ہے جس میں پاکستان اور بنگلہ دیش کے عوام کو فائدہ ہوگا اور خطے کے لئے بھی ترقی کی نئی راہیں کھلیں گی۔ معزز مہمان کو کلب کی جانب سے یادگاری شیلڈ اور پھول پیش کئے گئے۔

Short Link: https://urdu.app.com.pk/urdu/?p=597103