تہران ۔30اگست (اے پی پی):ایران نے کہا ہے کہ وہ جوہری ٹیکنالوجی سے ہتھیار بنانے کا ارادہ نہیں رکھتا، اس ٹیکنالوجی کو صرف سویلین مقاصد کے لیے استعمال کیا جائے گا۔چینی خبررساں ادارے کے مطابق یہ بات ایران کے صدر ابراہیم رئیسی نے گزشتہ روز پریس کانفرنس کے دوران کہی ۔
انہوں نے کہا کہ جوہری صلاحیت ایرانی عوام کا حق ہے اور ہم نے کئی مرتبہ کہا ہے کہ ہمارے نظریے میں جوہری ہتھیاروں کی کوئی جگہ نہیں ،ہم زراعت، تیل و گیس، ادویات اور دیگر بہت سےشعبوں میں جوہری ٹیکنالوجی استعمال کرنے کے خواہاں ہیں۔ ا نہوں نے اسرائیل پر تنقید کرتے ہوئے کہاکہ وہ ایران کی جوہری صلاحیت کو ختم کرناچاہتا ہے
۔صدر رئیسی نے کہاکہ ایران اور عالمی طاقتوں کے درمیان 2015 کے جوہری معاہدے کی بحالی تک پہنچنے سے پہلے تحفظات کو حل کیا جانا چاہیے،اس کے بغیر معاہدے کی بحالی ممکن نہیں ۔ انہوں نے بین الاقوامی ایٹمی توانائی ایجنسی کی تین مقامات پر مبینہ طور پر "یورینیم کے آثار کی دریافت” کے بارے میں رپورٹوں کا حوالہ دیتے ہوئے کہا کہ معاہدہ حفاظتی امور اور نکات کے حل کے ساتھ ہونا چاہیے۔
انہوں نے کہاکہ ایران مخالف پابندیوں کا خاتمہ اور بیرون ملک ایرانی اثاثوں کو غیر منجمد کرنا جوہری مذاکرات کا مرکز رہا ہے۔واضح رہے کہ ایران اور امریکہ اس وقت یورپی یونین کے رابطہ کار کی حالیہ تجویز کے بارے میں بالواسطہ تبادلہ خیال میں مصروف ہیں۔
Short Link: https://urdu.app.com.pk/urdu/?p=324492
