حالیہ بھارتی جارحیت کے خلاف حکومت، افواج پاکستان، میڈیا، پارلیمان اور پوری قوم کویکجہتی کا مظاہرہ کرنے پرخراج تحسین پیش کرتا ہوں،جمال شاہ کاکڑ

اسلام آباد۔19مئی (اے پی پی):رکن قومی اسمبلی جمال شاہ کاکڑ نے کہا ہے کہ حالیہ بھارتی جارحیت کے خلاف حکومت، افواج پاکستان، میڈیا، پارلیمان اور پوری قوم نے جس یکجہتی کا مظاہرہ کیا اس پر انہیں خراج تحسین پیش کرتا ہوں، اگر یہی اتحاد برقرار رہا تو بھارت تو دور کی بات دنیا کی کوئی طاقت پاکستان کا کچھ نہیں بگاڑ سکتی۔

پیر کو قومی اسمبلی اجلاس کے دوران اظہارخیال کرتے ہوئے انہوں نے کہا کہ بلوچستان میں وزیراعلی میر سرفرازبگٹی اور مولانا فضل الرحمان نے اظہار یکجہتی کیلئے جو عوامی اجتماعات منعقد کئے اس پر انہیں خراج تحسین پیش کرتا ہوں۔ اس موقع پر انہوں نے بلوچستان کے ٹرانسپورٹرز کو درپیش مسئلہ کی طرف بھی ایوان کی توجہ مبذول کرائی اور کہا کہ اس حوالے سے اقدامات کئے جائیں اور پنجاب حکومت سے یہ مسئلہ حل کرایا جائے۔

Short Link: https://urdu.app.com.pk/urdu/?p=599045