اسلام آباد۔25اکتوبر (اے پی پی):حج درخواستوں کی وصولی کیلئے مجاز بینکوں کے انتخاب کا پہلا مرحلہ مکمل ہو گیا۔ وزارتِ مذہبی امور کی ٹینڈر کمیٹی نے 15کمرشل بینکوں کی جانب سے جمع کرائے گئے ٹینڈر کھول دیئے ۔ موصول شدہ تکنیکی اور مالی تجاویز کی پیپرا رولز کے مطابق جانچ پڑتال کے بعد حج 2025 کیلئے درخواستوں کی وصولی کے مجاز بینکوں کا حتمی انتخاب نومبر کے پہلے ہفتہ تک متوقع ہے۔
وزارت مذہبی امور کے ترجمان کے مطابق وزارت ہذا میں حج 2025 کی درخواستوں کی وصولی کیلئے بینکوں کیلئے نوٹس برائے تجاویز کے جواب میں ٹینڈر اوپننگ اجلاس جمعہ کو جوائنٹ سیکرٹری حج سجاد حیدر یلدرم کی زیرصدارت منعقد ہوا۔ دیگر اراکین ٹینڈر کمیٹی میں وزارتِ مذہبی امور کے جوائنٹ سیکرٹری انتظامیہ اسد اللہ فیض، چیف فنانس اینڈ اکاونٹس افسر ذوالفقار خان، ڈپٹی سیکرٹری حج آپریشن ناصر عزیز خان، ڈپٹی ڈائریکٹر حج آئی ٹی سیل حکیم خان خٹک، اسسٹنٹ ڈائریکٹر آئی ٹی جمیل الرحمن سیکرٹری کمیٹی اکاونٹس افسر حجاج بہبود فنڈ محمد حفیظ کھوکھر شامل ہوئے۔
تمام 15ٹینڈرز کو بینکوں کے نمائندگان کی موجودگی میں کھولا گیا اور تجاویز کے چیدہ نکات کو پڑھ کر سنایا گیا۔ چیئرمین ٹینڈر کمیٹی سجاد حیدر یلدرم نے اجلاس کے دوران امید ظاہر کی کہ بینکوں کے انتخاب کے شفاف عمل سے نہ صرف کمرشل بینکوں کے درمیان صحت مند مقابلے کے فضاء قائم ہو گی بلکہ عازمینِ حج کو بھی مزید بہتر سہولیات فراہم کی جا سکیں گی۔
