اسلام آباد۔1جون (اے پی پی):اسلامی نظریاتی کونسل نے کہا ہے کہ کونسل کے حوالے سے حج سبسڈی کی مخالفت کے حوالے سے چلنے والی خبریں حقائق کے منافی ہیں، اسلامی نظریاتی کونسل کا حج سبسڈی کے حوالے سے سابق دور میں دیئے گئے فیصلے کے مطابق حج سبسڈی شرعاً جائز ہے۔
بدھ کو اپنے ایک وضاحتی بیان میں اسلامی نظریاتی کونسل کے ترجمان نے کہا کہ گزشتہ حکومت نے اسلامی نظریاتی کونسل سے حج سبسڈی کے متعلق استفسار کیا تھا جس پر وزارت مذہبی امور کو اسلامی نظریاتی کونسل نے جس پر رائے دیتے ہوئے کہا تھا کہ شرعاً حکومت کی طرف سے حج پر سبسڈی دینا جائز ہے، اس میں کوئی حرج نہیں ہے اور یہ عمل حجاج کے صاحب استطاعت ہونے کے منافی نہیں۔ نیز یہ سبسڈی بلاتفریق دی جائے، چاہے کوئی سرکاری طور پر حج کرے یا پرائیویٹ طور پر، تاہم حکومت زکوۃ کی رقوم سے سبسڈی دینے سے احتیاط برتے تو زیادہ بہتر ہے۔
اس حوالے سے اسلامی نظریاتی کونسل کے چیئرمین ڈاکٹر قبلہ ایاز نے حکومت کی طرف سے جاری کردہ سرکاری حج پیکچ پر تبصرہ کرتے ہوئے کہا کہ حج کو آسان بنانے اور اخراجات میں کمی لانے کے لیے وفاقی وزارت مذہبی امور کی کاوشیں لائق صد تحسین ہیں۔ حج سبسڈی کے متعلق سوال پر ان کا کہنا تھا کہ حکومت کی طرف سے عازمین حج کے لیے سبسڈی دینے میں شرعا کوئی حرج نہیں اور تین برس قبل اسلامی نظریاتی کونسل اس سلسلے میں وزارت مذہبی امور کو شرعی موقف سے آگاہ کرچکی ہے۔
