اسلام آباد۔8مئی (اے پی پی):وزارتِ مذہبی امور نے پرائیویٹ سکیم کے تحت حج کی سعادت کے خواہشمند افراد کو ہدایت کی ہے کہ وہ نجی منتظمین کے ذریعے حج پیکجز کی بکنگ کرتے وقت مکمل احتیاط سے کام لیں۔ جمعرات کو ترجمان مذہبی امور نے ایک بیان میں کہا کہ مملکتِ سعودی عرب کی وزارتِ حج و عمرہ کی جانب سے مقرر کردہ وقت کے اندر بعض نجی منتظمین کی جانب سے مشاعر (طوافہ و قدانہ)واجبات کی عدم ادائیگی کے باعث پرائیویٹ حج سکیم کے تحت مختص کوٹے میں ترمیم کی گئی ہے، اب اس سکیم کے تحت کل کوٹہ تقریباً 25,698 عازمین تک محدود کر دیا گیا ہے، حج 2025 کے لیے کسی بھی قسم کے اضافی کوٹے کی منظوری نہیں دی جائے گی۔
عازمینِ حج کے لیے ایک محفوظ اور باقاعدہ حج کے انتظامات کو یقینی بنانے کے لیے اس بات کی احتیاط کی جائے کہ کسی بھی ادائیگی سے قبل نجی منتظم کی حیثیت اور حج کوٹے کی تازہ ترین منظوری کی تصدیق کریں، منظور شدہ منتظمین کی فہرست اور اپنے کوائف کی تصدیق کے لیے وزارت کی درج ذیل ویب سائٹ وزٹ کریں،سوشل میڈیا یا دیگر غیر رسمی ذرائع پر دی جانے والی غیر مصدقہ معلومات یا اشتہارات پر ہرگز انحصار نہ کریں،تمام منتظمین کو سختی سے ہدایت کی جاتی ہے
کہ وہ اپنی سرکاری طور پر تصدیق شدہ کوٹے سے زائد کسی بھی عازمِ حج کی بکنگ نہ کریں، خلاف ورزی کی صورت میں وزارت کی جانب سے سخت کارروائی عمل میں لائی جائے گی۔ان کا کہنا تھا کہ وزارت ایک شفاف، ذمہ دار اور مربوط حج آپریشن یقینی بنانے کے لیے پرعزم ہے، اس مقصد کے حصول کے لیے عوام کا تعاون ناگزیر ہے تاکہ تمام انتظامات حج پالیسی اور سعودی عرب کے قواعد و ضوابط کے مطابق انجام پا سکیں۔
Short Link: https://urdu.app.com.pk/urdu/?p=594304
