اسلام آباد۔8جولائی (اے پی پی):حج 2026ء کے خواہشمند 2 لاکھ پاکستانیوں نے رجسٹریشن کرا لی، حج رجسٹریشن کا عمل (کل)بدھ 9 جولائی تک جاری رہے گا۔ وزارت مذہبی امور کے ذرائع کے مطابق حج 2026ء کیلئے 15 نامزد بینکوں سمیت گھر بیٹھے آن لائن بھی رجسٹریشن کرائی جا سکتی ہے جس کی کوئی فیس ادا نہیں کرنا ہو گی۔
رجسٹریشن کرانے والے درخواست گزار ہی حج 2026ء کے اہل تصور ہوں گے۔ حج رجسٹریشن کے بعد عازمین سرکاری یا نجی حج سکیم منتخب کر سکیں گے۔ وزارت مذہبی امور کے ذرائع کا کہنا ہے کہ حج رجسٹریشن سعودی عرب کی ہدایت پر کی جا رہی ہے۔ رجسٹریشن کے اعداد و شمار سے سعودی حکومت کو آگاہ کیا جائے گا، اسی بنیاد پر سعودی حکومت پاکستان کا حج کوٹہ مقرر کرے گی۔
