بیروت ۔3فروری (اے پی پی):حزب اللہ کے سیکرٹری جنرل نعیم قاسم نے تنظیم کے سابق سیکرٹری جنرل حسن نصراللہ اور ایگزیکٹو کونسل کے سابق سربراہ ہاشم صفی الدین کی باقاعدہ تدفین 23 فروری کو کرنے کا اعلان کردیا،قبل ازیں انہیں خفیہ اور عارضی طور پر دفن کیا گیا تھا،
حسن نصراللہ کو بیروت کے جنوب میں اور صفی الدین کو جنوبی لبنان میں ان کے آبائی شہر میں دفن کیا جائے گا۔ العربیہ کے مطابق حسن نصر اللہ 4 ماہ قبل( 27 ستمبر )بیروت کے جنوبی مضافات میں اسرائیلی فضائی حملے میں شہید ہوئے بعد ازاں انہیں خفیہ اور عارضی طور پر دفن کیا گیا تھا
۔
نعیم قاسم نے ایک ٹیلی ویژن تقریر میں کہا کہ ہم نے اجتماعی جنازے کے لیے 23 فروری کو منتخب کرنے کا فیصلہ کیا ہے۔انہوں نے نشاندہی کی کہ اس تقریب میں پارٹی کی ایگزیکٹو کونسل کے سابق سربراہ ہاشم صفی الدین کا جنازہ بھی شامل ہوگا جو اکتوبر کے اوائل میں اسی طرح کے اسرائیلی حملے میں مارے گئے تھے۔
نعیم قاسم نے پہلی بار انکشاف کیا کہ صفی الدین کو نصراللہ کی جگہ سیکرٹری جنرل منتخب کیا گیا تھا لیکن اس حوالے سے اعلان سے پہلے ہی انہیں بھی قتل کر دیا گیا۔انہوں نے کہا کہ حسن نصراللہ کو بیروت کے جنوب میں اور صفی الدین کو جنوبی لبنان میں ان کے آبائی شہر میں دفن کیا جائے گا۔ اسرائیل کے ساتھ جنگ کے بارے ان کا کہنا تھا کہ یہ ایسی جنگ ہے جس میں نفع و نقصان دونوں شامل ہیں۔
Short Link: https://urdu.app.com.pk/urdu/?p=555159
