راولپنڈی۔6فروری (اے پی پی):حسن علی کی تباہ کن بائولنگ کے باعث جنوبی افریقہ کی ٹیم راولپنڈی ٹیسٹ کے تیسرے روز اپنی پہلی اننگز میں 201 رنز بناکر آئوٹ ہوگئی اور اسے 71 رنز خسارے کا سامنا کرنا پڑا، تیمبا بووما 44 رنز کے ساتھ ٹاپ سکورر رہے، حسن علی نے 5 کھلاڑیوں کو آئوٹ کیا، پاکستان نے اپنی دوسری اننگز میں6 وکٹوں کے نقصان پر 129 رنز بنا لئے اور اسے 200 رنز کی برتری حاصل ہو گئی ہے، اظہر علی 33 اور فہیم اشرف 29 رنز کے ساتھ نمایاں رہے، محمد رضوان 28 رنز کے ساتھ وکٹ پر موجود ہیں، جارج لنڈے نے 3 وکٹیں حاصل کیں، ہفتہ کو یہاں راولپنڈی کرکٹ سٹیڈیم میں ٹیسٹ کے تیسرے روز جنوبی افریقہ نے اپنی پہلی نامکمل اننگز 106 رنز 4 کھلاڑی آئوٹ پر دوبارہ شروع کی تو کوئنٹن ڈی کاک 24 اور تیمبا بووما 15 رنز کے ساتھ وکٹ پر موجود تھے، ڈی کاک گزشتہ روز کے سکور میں صرف پانچ رنز کا اضافہ کرنے کے بعد شاہین آفریدی کی گیند پر کلین بولڈ ہو گئے، اس موقع پر تیمبا بووما اور ویان مولڈر نے اچھی بیٹنگ کی اور 50 رنز کی شراکت قائم کرکے ٹیم کا سکور 164 تک پہنچا دیا، مولڈر بدقسمت رہے اور 33 رنز بنانے کے بعد رن آئوٹ ہوگئے، اس کے بعد جنوبی افریقہ کی وکٹیں وقفے وقفے سے گرتی رہیں اور پوری ٹیم 201 رنز بناکر آئوٹ ہو گئی، بووما 44 رنز کے ساتھ ناقابل شکست رہے، جارج لنڈے 21 ، کیشو مہاراج ایک اور اینرچ نورجے بغیر کوئی رن بنائے حسن علی کا شکار بنے جبکہ کگیسو ربادا رن آئوٹ ہوئے، حسن علی نے 54 رنز کے عوض 5 وکٹیں حاصل کیں، دوسری اننگز میں پاکستان نے کھیل کے اختتام پر 6 وکٹوں کے نقصان پر 129 رنز بنا لئے اور اسے 200 رنز کی مجموعی برتری حاصل ہو گئی ہے، عمران بٹ صفر، عابد علی 13 ، اظہر علی 33 ، بابر اعظم 8 ، فواد عالم 12 اور فہیم اشرف 29 رنز بناکر آئوٹ ہوئے، محمد رضوان 28 رنز کے ساتھ ناٹ آئوٹ ہیں، جارج لنڈے نے تین، کیشو مہاراج نے دو اور کگیسو ربادا نے ایک وکٹ حاصل کی۔
