لاہور۔15مارچ (اے پی پی):سابق وزیراعلی پنجاب حمزہ شہباز ہفتہ کے روز شملہ پہاڑی کے علاقہ میں مسلم لیگ ن کے کارکن گڈو شاہ کے گھر گئے۔ حمزہ شہبازشریف نے مسلم لیگ ن کے آفس سیکرٹری و دیرینہ کارکن گڈو شاہ کی وفات پر ان کے اہلخانہ سے اظہار افسوس کیا ۔اس موقع پر مسلم لیگ ن کے رہنماء عمران گورائیہ سمیت دیگر افراد بھی موجود تھے ۔
اس موقع پر حمزہ شہبازشریف نے کارکنوں سے گفتگو کرتے ہوئے کہا کہ گڈو شاہ ایک محنتی ایماندار کارکن تھے، انہوں نے پارٹی کیلئے بہت خدمات انجام دیں، الحمدللہ، وزیراعظم شہبازشریف کی قیادت میں ملک ترقی کی راہ پر چل نکلا، جب تک ملک میں مکمل طور پر امن قائم نہیں ہوگا ترقی کا خواب شرمندہ تعبیر نہیں ہوگا، حمزہ شہبازشریف نے کہا کہ رواں ماہ ترسیلات زر 13.1 ارب ڈالر تک پہنچ گئی ہیں جو کہ خوش آئند بات ہے، اسی تیزی سے ہمیں اپنی برآمدات کو بڑھانا ہے، پاکستان کی معاشی ترقی کے لیے زراعت، انڈسٹری، کامرس، فنانس، آئی ٹی، معدنیات اور میری ٹائم انتہائی اہم شعبے ہیں، حمزہ شہباز نے کہا کہ معاشی شعبہ سے منسلک اداروں کی کارکردگی اور معاملات تسلی بخش ہیں، شہبازشریف کی قیادت میں مہنگائی اور پالیسی ریٹ میں کمی جیسے اقدامات عوام کے سامنے ہیں، انہوں نے کہا کہ ہم عوام کے نمائندے ہیں اور ان کی خدمت کرنے آئے ہیں،ہمیں تیزی سے آگے بڑھنا ہے اور منزل کو حاصل کرنا ہے۔
ملک سے دھشتگردی کے مکمل خاتمے کے عزم میں پوری قوم افواج پاکستان کے شانہ بشانہ کھڑی ہے. دہشت گردی واقعات کی شدید مذمت کرتا ہوں۔
Short Link: https://urdu.app.com.pk/urdu/?p=573063
