لاہور۔9مئی (اے پی پی):پنجاب ویمن پروٹیکشن اتھارٹی کی چیئرپرسن اور رکن پنجاب اسمبلی حنا پرویز بٹ نے لاہور کی گجر کالونی میں16 سالہ مقتولہ سدرہ کے گھر جا کر اہل خانہ سے ملاقات کی اور اس دلخراش واقعے پر دلی رنج و غم کا اظہار کیا۔
انہوں نے مرحومہ کے اہل خانہ کو مکمل قانونی معاونت اور حکومتِ پنجاب کی جانب سے فوری انصاف کی فراہمی کی یقین دہانی کروائی۔ایف آئی آر نمبر 2792/25 تھانہ کوٹ لکھپت میں درج کی گئی،جس کے مطابق سدرہ کو اس کے والد بشیر احمد نے اپنے بھائیوں محمد عمران اور جبار کے ساتھ مل کر گلا گھونٹ کر قتل کیا اور لاش کو چھپا کر اوڈھ محلہ قبرستان میں خفیہ طور پر دفنا دیا۔
پولیس نے کارروائی کرتے ہوئے تینوں ملزمان کو گرفتار کر لیا ہے اور ان کے خلاف دفعات302،201 اور34 تعزیراتِ پاکستان کے تحت مقدمہ درج کر لیا گیا ہے۔
اس موقع پر گفتگو کرتے ہوئے چیئرپرسن حنا پرویز بٹ نے کہا کہ یہ واقعہ انسانیت سوز اور انتہائی افسوسناک ہے۔ہم ایسے سفاک جرائم پر خاموش نہیں بیٹھ سکتے۔وزیراعلی مریم نوازکی واضح ہدایت ہے کہ خواتین اور بچیوں پر کسی بھی قسم کا تشدد ناقابل برداشت ہے۔
پنجاب ویمن پروٹیکشن اتھارٹی مظلوم خاندانوں کے ساتھ ہر قدم پر کھڑی ہے۔انہوں نے مزید کہا کہ متاثرہ خاندان کو قانونی، نفسیاتی اور فلاحی معاونت فراہم کی جائے گی تاکہ وہ اس صدمے سے باہر آ سکیں اور انہیں بروقت انصاف مل سکے۔
Short Link: https://urdu.app.com.pk/urdu/?p=594901
