اسلام آباد۔10اگست (اے پی پی):وزیراعظم محمد شہباز شریف نے ملکی تعمیر و ترقی میں اقلیتوں کے کلیدی کردار کو سراہتے ہوئے کہا ہے کہ تمام اقلیتوں کی فلاح و بہبود حکومت کے ترجیحی فرائض میں شامل ہے،حکومت اقلیتوں کی سرکاری اداروں، پارلیمنٹ اور قومی دھارے میں بھرپور شمولیت کے لیے پرعزم ہے۔
اقلیتوں کے قومی دن پر اپنے پیغام میں وزیراعظم محمد شہباز شریف نے کہا کہ پاکستان اقلیتوں کے حقوق کے تحفظ اور ملکی تعمیر و ترقی میں اقلیتوں کے کلیدی کردار کی تحسین میں اقوام عالم کے ساتھ ہے، آج ہم بانی پاکستان کے اقلیتوں کے بارے میں فرمودات اور اسلامی تعلیمات کی روشنی میں اقلیتوں کی مذہبی آزادی اور یکساں حقوق کے لیےہمہ وقت کوشاں رہنے کے عہد کی تجدید کرتے ہیں۔ بانی پاکستان قائد اعظم محمد علی جناح کی 11 اگست 1947 کی تاریخی تقریر پاکستان میں اقلیتوں کے محفوظ مستقبل کی نظریاتی ضمانت ہے۔
سکھ، عیسائی ،ہندواور پارسی سمیت پاکستان میں موجود تمام اقلیتوں کی فلاح و بہبود حکومت کے ترجیحی فرائض میں شامل ہے۔ انہوں نےکہا کہ پاکستان اقلیتوں کی ہر شعبہ ہائے زندگی میں انجام دی گئی ناقابل فراموش خدمات کو اپنا ملکی و قومی اثاثہ سمجھتا ہے۔ اقلیت سے تعلق رکھنے والے کئی پاکستانی سپوت ملکی دفاع میں بہادری سے اپنی جان نچھاور کر چکے ہیں ہم انکو دل کی گہرائیوں سےخراج عقیدت پیش کرتے ہیں۔پاکستان کو اپنی اقلیتوں کے جذبہ حب الوطنی، پیشہ وارانہ محنت اور قومی ورثہ و ثقافت سے لگاؤ پر فخر ہے۔
وزیراعظم نے کہا کہ یہ امر باعث اطمینان ہےکہ پاکستان میں اقلیتوں کو آئین پاکستان کے تحت تمام سیاسی، معاشی اور سماجی حقوق حاصل ہیں۔ اقلیتوں کے حقوق کا تحفظ نہ صرف آئینی ذمہ داری ہے بلکہ یہ ہمارا مذہبی فریضہ بھی ہے کیوں کہ اسلام اقلیتوں کے شہری، مذہبی اور سماجی حقوق کی تحفظ کی خصوصی تلقین کرتا ہے۔ علماء اور مذہبی رہنماؤں کا مذہبی آزادی کے تحفظ، عبادت گاہوں اور اقلیتی نمائندوں کی عزت و ناموس کو یقینی بنانے میں کلیدی کردار ہے۔
انہوں نے کہا کہ انہی اعلی مذہبی اور آئینی اقدار کی رہنمائی میں حکومت پاکستان اقلیتوں کی سرکاری اداروں، پارلیمنٹ اور قومی دھارے میں بھرپور شمولیت کے لیے پرعزم ہے۔اقلیتوں سمیت تمام پاکستانیوں کو اتحاد و یگانگت، باہمی عزت و رواداری پر عمل کرتے ہوئے اپنی قومی ذمہ داریوں کا احساس کرنے کی ضرورت ہے۔ آج کے دن تمام پاکستانی اور حکومت پاکستان بلا تفریق رنگ و نسل یک زبان ہو کر ملکی فرائض کی بااحسن ادائیگی کے عزم کا اعادہ کرتے ہیں۔
