اسلام آباد۔26اگست (اے پی پی):وزیراعظم محمد شہباز شریف نے کہا ہے کہ حکومت اور تمام متعلقہ ادارے معاشی ترقی و خوشحالی اور تجارت و سرمایہ کاری میں بہتری کے لئےپرعزم ہیں،کسٹم کے جانچ پڑتال اور تخمینہ کے نظام کو جدید ٹیکنالوجی سے ہم آہنگ اور فیس لیس کر کے شفافیت کو یقینی بنایا جائے۔
منگل کو وزیراعظم آفس کےمیڈیا ونگ سے جاری بیان کے مطابق انہوں نے ان خیالات کا اظہار کسٹم کے جانچ پڑتال اور تخمینہ کے نظام کو شفاف بنانے کے لئے کئے جانے والے اقدامات سے متعلق جائزہ اجلاس کی صدارت کرتے ہوئے کیا۔اجلاس میں وفاقی وزیر خزانہ محمد اورنگزیب، وفاقی وزیر ماحولیاتی تبدیلی ڈاکٹر مصدق ملک، وفاقی وزیر اطلاعات و نشریات عطاء اللہ تارڑ، وفاقی وزیر اقتصادی امور ڈویژن احد خان چیمہ، وزیر مملکت برائے خزانہ بلال اظہر کیانی اور دیگر متعلقہ سرکاری حکام نے شرکت کی ۔
وزیراعظم نے کسٹم حکام اور تمام متعلقہ اداروں کو اصلاحات کے جلد، مکمل اور موثر نفاذ کے لیے ضروری ہدایات جاری کیں۔ وزیراعظم نے کسٹم نظام میں شفافیت، ٹیکس کلیکشن میں اضافہ اور کاروباری حضرات کو سہولت جیسے اہم پہلوؤں کے لیے تمام ضروری اقدامات کرنے کی ہدایت کی۔ اجلاس میں وزیراعظم کو کسٹم کے جانچ پڑتال اور تخمینہ میں کئے جانے والے اب تک کے اقدامات سے آگاہ کیا گیااور بتایا گیا کہ مصنوعی ذہانت پر مبنی رسک منیجمنٹ سسٹم بھی جلد فعال ہو جائے گا۔
اجلاس کو بتایا گیا کہ کسٹم کی سکینرز کے ذریعے جانچ پڑتال میں مصنوعی ذہانت کے استعمال سے کسٹم کلیرنس میں درکار وقت کم سے کم ہوتا جا رہا ہے، حکومت کی سمگلنگ کے خلاف موثر کارروائیوں سے اشیاء کی غیر قانونی ترسیل میں کمی اور اشیاء کی باقاعدہ قا نونی نظام کے تحت کسٹم کلیئرنس کی تعداد میں اضافہ ہوا ہے،کسٹم میں جانچ پڑتال اور تخمینہ کے نظام کو فیس لیس کرنے کے لیے تمام ضروری اقدامات پر کام جاری ہے۔
وزیراعظم نے کہا کہ کسٹم کے نظام کی بہتری اور جدت کا مقصد برآمدات اور درآمدات سے منسلک کاروباری حضرات کو سہولت بہم پہنچانے کے ساتھ ملکی ریونیو میں اضافہ کرنا ہے،کسٹم جانچ پڑتال اور تخمینہ کے لیے انتظامی کارروائیوں میں درکار وقت کو کم سے کم کیا جائے،کسٹم نظام کی اصلاحات کے موثر نفاذ کے لیے تمام متعلقہ ادارے باہمی ہم آہنگی اور مربوط حکمت عملی کے تحت کام کریں۔
وزیر اعظم نے کہا کہ معاشی اور تجارتی اصلاحات کے ذریعے کاروبار اور سرمایہ کاری میں اضافہ کرنا حکومت کی اولین ترجیحات میں شامل ہے، کسٹم نظام کی اصلاحات میں بین الاقوامی سطح پر کی جانے والی قابل عمل اور بہترین حکمت عملی سے ہر ممکن استفادہ حاصل کیا جائے،ملکی معاشی ترقی و خوشحالی اور تجارت و سرمایہ کاری میں بہتری کی منزل کے حصول کے لیے حکومت اور تمام متعلقہ ادارے پرعزم ہیں۔
وزیراعظم نے ہدایت کی کہ کسٹم تخمینے پر کاروباری حضرات کی جانب سے کی جانے والی نظر ثانی اپیل سننے کا اختیار غیر جانبدار افسران کے سپرد کیا جائے،بندرگاہوں پر بڑھتی ہوئی کارگو اور اس کے جلد از جلد ترسیل کے لئے ایسی منظم منصوبہ بندی کی جائے تاکہ سامان جلد از جلد بندرگاہ سے اپنی منزل کی جانب رواں دواں ہو،کسٹم تخمینے پر نظر ثانی اپیل کے نظام کو شفاف بنانے کے لیے فوری طور پر ضروری اقدامات کیے جائیں۔
