کوئٹہ۔ 24 مارچ (اے پی پی):حکومت بلوچستان نے ریاست مخالف پروپیگنڈوں اورسرگرمیوں میں ملوث افسران کے خلاف کارروائی کا فیصلہ کیا ہے ، یہ فیصلہ پیر کو وزیر اعلیٰ بلوچستان میر سرفراز بگٹی کی زیر صدارت انتظامی افسران کے اعلیٰ سطحی اجلاس میں کیاگیا۔ اجلاس میں چیف سیکرٹری بلوچستان شکیل قادر خان، آئی جی پولیس معظم جاہ انصاری،محکمہ داخلہ ، ایس اینڈ جی اے ڈی، محکمہ تعلیم ، محکمہ صحت ، محکمہ خزانہ کے سیکرٹریز ،بلوچستان کے تمام ڈویژن کمشنرز، ڈپٹی کمشنرز ، ڈی آئی جیز اور ضلعی پولیس افسران نے ویڈیو لنک کے ذریعہ شرکت کی ۔اجلاس میں فرائض کی انجام دہی کے دوران جام شہادت نوش کرنے والے جوانوں کے لئے دعا و فاتحہ خوانی کی گئی ۔
اجلاس کو بلوچستان میں امن و امان اور سروس ڈلیوری سے متعلق تفصیلی بریفنگ دی گئی ۔اجلاس میں فیصلہ کیاگیاہے ریاست مخالف پروپیگنڈوں اور سرگرمیوں میں ملوث سرکاری ملازمین کے خلاف کارروائی کی جائے گی ،اس سلسلہ میں تمام کمشنرز اور ضلعی افسران کو تخریبی سرگرمیوں میں ملوث سرکاری ملازمین کے خلاف کارروائی کا حکم دیا گیا ،اجلاس میں فیصلہ کیا گیا کہ ضلعی سطح پر ریاست مخالف عناصر کو فورتھ شیڈول میں شامل کرکے ان کی منفی سرگرمیوں پر نظر رکھی جائے گی، وزیر اعلیٰ بلوچستان میر سرفراز بگٹی نے ہدایت کی کہ بلوچستان کے ہر تعلیمی ادارے میں قومی ترانہ پڑھا اور پاکستان کا قومی جھنڈا لہرایا جائے گا، ریاست کے احکامات کی بجا آوری فرائض منصبی میں شامل ہے،
ہر سرکاری افسر اور اہلکار کو عمل کرنا ہوگا، وزیر اعلیٰ بلوچستان میر سرفراز بگٹی نے افسران سے خطاب کرتے ہوئے کہاکہ امن و امان کی بحالی اولین ترجیح، صوبے میں کوئی شاہراہ بند نہیں ہوگی ، ہر ضلعی افسر اپنے علاقے میں ریاستی رٹ قائم کرنے کا ذمہ دار ہے ، دہشت گردی کے خلاف جنگ ریاست کے ہر ادارے اور ہر فرد کی جنگ ہے ہمیں مل کر لڑنا ہے، انہوں نے کہاکہ پالیسی حکومت دیتی ہے عمل درآمد فیلڈ افسران کی ذمہ داری ہے، انفرادی ذاتی سوچ ریاست کی پالیسی سے بالا تر نہیں ، کوئی بھی افسر حکومت کی پالیسی پر عمل درآمد نہیں کر سکتا تو رضا کارانہ طور پر عہدے سے الگ ہوجائے ،
وزیر اعلیٰ بلوچستان نے کہاکہ کسی بھی سیاسی پریشر سے بالا تر ہو کر تفویض کردہ آئینی ذمہ داری کو پورا کیا جائے، کسی چیک پوسٹ پر بھتہ خوری نہیں چلے گی ، وزیر اعلیٰ بلوچستان نے تنبیہ کی کہ ایسی کوئی بھی مصدقہ شکایت ملی تو متعلقہ ایس ایچ او یا رسالدار لیویز اپنے عہدہ پرنہیں رہے گا ، ریاست مخالف عناصر کا ڈٹ کر مقابلہ کرنا ہے، آئینی حلف کی پاسداری ضروری، ریاست مخالف عناصر کے سامنے نہیں جھکنا
، وزیر اعلیٰ بلوچستان نے ضلعی افسران کو ہدایت کی کہ عوامی میل جول اور اجتماعات میں حکومت پالیسیوں کی ایڈوکیسی و ترویج کریں، بلوچستان کا کلچر روایتوں کا امین ہے، جس میں مسافروں اور معصوم مزدوروں کے قتل کا سوچا بھی نہیں جاسکتا، بلوچ نوجوانوں کو لاحاصل جنگ میں دھکیلا جاررہا ہے جس سے کچھ حاصل نہیں ہوگا، ہر سطح پر میرٹ کو فروغ دیکر نوجوانوں کا ریاست پر اعتماد بحال کرنا ہے، یوتھ پالیسی منظور ہوچکی ، ضلعی افسران مقامی سطح پر نوجوانوں کو مثبت سرگرمیوں کی جانب راغب کریں۔
Short Link: https://urdu.app.com.pk/urdu/?p=575909
