لاہور۔27اگست (اے پی پی):نگراں وزیر اطلاعات پنجاب عامر میر نے واضح کیا ہے کہ حکومت تھیٹرز کے نام پر بیہودگی پھیلانے والے عناصر سے بلیک میل نہیں ہوگی اور کسی دھمکی اور دبا میں نہیں آئے گی۔اتوار کو میڈیا سے گفتگو کرتے ہوئے انہوں نے کہا کہ کہ فحاشی اور عریانی پھیلانے والے عناصر حقیقی فنکاروں کے ترجمان بننے کی کوشش مت کریں۔
صوبائی وزیر اطلاعات نے کہا کہ جینوئن فنکار بیہودگی کے خلاف کریک ڈائون پر حکومت پنجاب کے ساتھ ہیں۔ انہوں نے کہا کہ فحش مجروں سے مال بنانے والے عناصر فنکاروں کے نمائندے تسلیم نہیں کئے جا سکتے، تھیٹر کو فحش مجروں کی آماجگاہ بنانے والوں کے خلاف کریک ڈائون جاری رہے گا اور عوام کو گمراہ کرنے کی کوشش میں ملوث عناصر پر بھی ہاتھ ڈالا جائے گا۔ عامرمیر نے کہا کہ ریاست کی رٹ چیلنج کرنے والوں کا سخت احتساب کیا جائے گا۔
ایک سوال کے جواب میں انہوں نے بتایا کہ پنجاب حکومت ڈرامہ ایکٹ میں ترامیم متعارف کروا رہی ہے اور ڈراموں میں ڈانس پر پابندی لگا دی جائے گی، اس کے علاوہ ڈرامہ ایکٹ کی خلاف ورزی کرنے والے پروڈیوسرز کو سزائیں دی جائیں گی اور جرمانے ہونگے۔ ان کا مزید کہنا تھا کہ پنجاب کابینہ کی منظوری کے بعد نیا ڈرامہ ایکٹ بہت جلد نافذ کیا جائے گا۔
صوبائی وزیر نے کہا کہ تھیٹر مالکان اور پروڈیوسرز نے تنبیہہ کے باوجود فحش مجرے جاری رکھے جس وجہ سے انہیں سیل کیا گیا۔سر بمہر کئے گئے کمرشل تھیٹرز نئے ڈرامہ قوانین کے نفاذ تک بند رہیں گے،لاہور کے تھیٹرز ڈرامہ ایکٹ کی واضح خلاف ورزی پر بند کیے گئے، لاہور ڈویژن سے باہر کے تھیٹروں کی مانیٹرنگ بھی جاری ہے اور جس تھیٹر میں بھی بیہودگی پھیلائی گئی اسے بند کر دیا جائے گا۔
عامر میر نے کہا کہ ثقافتی مراکز کو فحش مجروں کے مراکز نہیں بننے دیا جائے گا۔انہوں نے کہا کہ تھیٹرز میں ڈراموں کے نام پر بے حیائی پھیلائی جا رہی تھی، چند ضمیر فروشوں کی مادہ پرستی نے پرفارمنگ آرٹ کے مراکز کو فحاشی کے اڈے بنا ڈالا تھا، تھیٹرز کو پاکستانی ثقافت اور پرفارمنگ آرٹ کے فروغ کی ذمہ داری دی جائے گی۔
Short Link: https://urdu.app.com.pk/urdu/?p=383169
