اسلام آباد۔3مارچ (اے پی پی):وزیراعظم محمد شہباز شریف نے جنگلی حیات کے تحفظ کے عزم کا اعادہ کرتے ہوئے کہا ہے کہ حکومت حیاتیاتی تنوع کی اہمیت سے متعلق شعور بیدار کرنے کے لئے کوشاں ہے ، آئیے پاکستان کی خوبصورت جنگلی حیات کی بہتری کے لئے مل کر کام کریں۔
پیر کو وزیراعظم آفس کے میڈیا ونگ سے جاری بیان کے مطابق جنگلی حیات کے عالمی دن کے موقع پر اپنے پیغام میں وزیراعظم نے کہا کہ جنگلی حیات کا عالمی دن انسانیت اور فطرت کے درمیان تعلق کی ایک یاد دہانی کے طور پر منایا جاتا ہے، یہ دن ہمیں یہ بھی یاد دلاتا ہے کی ہم غیر معمولی جنگلی حیات کے تحفظ کے لئے اپنی ذمہ داری پر غور کریں جو ہماری زندگیوں اور ماحولیاتی نظام کو تقویت بخشتی ہے۔
انہوں نے کہا کہ ہمالیہ کے برفانی چیتے سے لے کر خطرے سے دوچار دریائے سندھ کی ڈولفن اور بحیرہ عرب کی شاندار وہیل شارک تک پاکستان کو مسحور کن حیاتیاتی تنوع سے نوازا گیا ہے، یہ انواع صرف ہمارے قدرتی ورثے کا حصہ نہیں ہیں بلکہ یہ جاندار ماحولیاتی توازن کو برقرار رکھنے اور ہمارے ماحول اور معیشت کو برقرار رکھنے میں اہم کردار ادا کرتے ہیں۔ انہوں نے کہا کہ اس سال جنگلی حیات کے عالمی دن کا موضوع ’وائلڈ لائف کنزرویشن فنانس: لوگوں اور اپنے سیارے زمین میں سرمایہ کاری‘ صحت مند ماحولیاتی نظام، پائیدار معیشتوں اور انسانی بہبود کو برقرار رکھنے میں جنگلی حیات کے ناگزیر کردار کو تسلیم کرتے ہوئے جنگلی حیات کی نسلوں کے تحفظ کے لئے جدید مالیاتی طریقہ کار کی اہم ضرورت کو اجاگر کرتا ہے۔
انہوں نے کہا کہ اپنے لوگوں اور کرہ ارض دونوں کے لئے پائیدار مستقبل میں سرمایہ کاری کرتے ہوئے ہمارا گرین پاکستان پروگرام مقامی کمیونٹیز کو معاشی مواقع فراہم کرتا ہے جو غیر قانونی شکار اور رہائش گاہوں کی تباہی کو روکتا ہے۔ انہوں نے کہا کہ خطرے سے دوچار جنگلی جانوروں کے حوالے سے بین الاقوامی تجارت کے کنونشن پر دستخط کرنے سے جنگلی حیات کی غیر قانونی تجارت کے خلاف قانون سازی کو تقویت ملتی ہے۔
مزید برآں اسلام آباد وائلڈ لائف مینجمنٹ بورڈ ، وزارت موسمیاتی تبدیلی اور ماحولیاتی رابطہ کاری کے تحت زخمی، یتیم اور جبر و زیادتی کے شکار جانوروں کی بحالی کے لئے وائلڈ لائف ریسکیو سینٹر قائم کیا گیا ہے جس کا مقصد انہیں جنگلی حیات میں دوبارہ شامل کرنا یا ان کی مخصوص ضروریات کو پورا کرنے والی پناہ گاہوں میں جگہ دینا ہے۔
انہوں نے کہا کہ ہماری حکومت مقامی کمیونٹیز، ماحول کے تحفظ کرنے والوں اور بین الاقوامی شراکت داروں کے ساتھ مل کر حیاتیاتی تنوع کی اہمیت کے بار میں بیداری پیدا کرنے کی کوششوں کو مضبوط بنا رہی ہے۔ انہوں نے کہا کہ آئیے پاکستان کی خوبصورت جنگلی حیات کی بہتری کے لئے مل کر کام کریں اور عالمی برادری کے ایک فرض شناس رکن کے طور پر اپنی ذمہ داری پوری کریں۔
Short Link: https://urdu.app.com.pk/urdu/?p=568191
