کراچی۔ 15 اپریل (اے پی پی):حکومت سندھ نے ناقص وغیرمحفوظ کمرشل گاڑیوں کی رجسٹریشن کی منسوخی سمیت گرین لائن اوراورنج لائن کی گاڑیوں کو بروئے کار لاتے ہوئے آئندہ ہفتے نیا روٹ شروع کرنے کا فیصلہ کیا ہے ، سندھ بھر میں کمرشل گاڑیوں کے معائنے کیلئے 10ایم وی آئی سینٹرز قائم کیے جائیں گے۔منگل کو جاری اعلامیہ کے مطابق یہ بات سندھ کے سینئر وزیرشرجیل انعام میمن نے سندھ سیکریٹریٹ میں محکمہ ٹرانسپورٹ و ماس ٹرانزٹ کے اہم اجلاس کی صدارت کرتے ہوئے کہی۔انہوں نے محکمہ ٹرانسپورٹ کو خواتین کیلئے مخصوص پنک ای وی اسکوٹر اسکیم جلد شروع کرنے کی ہدایات جاری کردی ہیں، پنک اسکوٹی کیلئے ملازمت پیشہ خواتین اور طالبات درخواست گزاروں کیلئے ڈرائیونگ لائسنس کا ہونا لازمی قرار دیا گیا ہے۔
اجلاس میں ٹرانسپورٹ کے مختلف منصوبوں پر پیش رفت اور روڈ سیفٹی سے متعلق حکومتی اقدامات کاجائزہ لیا گیا اور کمرشل گاڑیوں کے معائنے کے نظام کو جدید خطوط پراستوار کرنے سے متعلق اہم فیصلے کئے گئے ۔سندھ کے سینئر وزیربرائے اطلاعات، ٹرانسپورٹ و ماس ٹرانزٹ شرجیل انعام میمن کی ہدایات پر اجلاس میں نیشنل ہائی وے اور سپر ہائی وے پر کمرشل گاڑیوں کے معائنے کیلئے ایم وی آئی سینٹرز قائم کرنے کا بھی فیصلہ کیا گیاہے۔شرجیل انعام میمن نے کہا کہ سندھ بھر میں کمرشل گاڑیوں کے معائنے کیلئے 10ایم وی آئی سینٹرز قائم کیے جارہے ہیں، کراچی میں دو ایم وی آئی سینٹرز پہلے سے ہی فعال ہیں، مزید سینٹرز پر کام کو جلد از مکمل کیا جا رہا ہے۔انہوں نے کہا کہ کراچی میں تین مزید اور سندھ کے باقی اضلاع میں 5ایم وی آئی سینٹرز قائم کئے جا رہے ہیں، ہم ٹرانسپورٹ کے شعبے کو جدید، محفوظ اور عوام دوست بنانے کیلئے ہر ممکن اقدامات اٹھا رہے ہیں۔
انہوں نے مزید کہا کہ جون میں 34نئی الیکٹرک بسیں اور 5ڈبل ڈیکر بسیں کراچی پہنچیں گی جبکہ مزید 100بسیں بھی جون ہی میں پہنچ جائیں گی۔اس موقع پر انہوں نے ابتدائی مرحلے میں 500الیکٹرک ٹیکسیاں متعارف کروانے کیلئے بھی ضروری اقدامات کی ہدایات جاری کیں۔ انہوں نے کہا کہ ہماری کوشش ہے کہ عوام کو سستی، ماحول دوست اور بااعتماد سفری سہولیات مہیا کی جائیں، سندھ کا ٹرانسپورٹ نظام ایک نئے دور میں داخل ہو رہا ہے، جس میں جدید ٹیکنالوجی اور سہولت دونوں کو مدنظر رکھا جا رہا ہے۔ اجلاس میں سیکریٹری ٹرانسپورٹ اسد ضامن، سندھ ماس ٹرانزٹ اتھارٹی کے مینیجنگ ڈائریکٹر کمال دایو، پیپلز بس سروس کے پروجیکٹ ڈائریکٹر صہیب شفیق اور دیگر نے شرکت کی۔
Short Link: https://urdu.app.com.pk/urdu/?p=582511
