اسلام آباد۔25اپریل (اے پی پی):وزیراعظم محمد شہباز شریف نے کہا ہے کہ حکومت ملک سے ملیریا کے خاتمے کیلئے ضروری اقدامات کر رہی ہے ۔ جمعہ کو وزیراعظم آفس کے میڈیا ونگ کی طرف سے جاری بیان کے مطابق ملیریا کے عالمی دن پر وزیراعظم نے اپنے پیغام میں کہا کہ ملیریا کا عالمی دن بین الاقوامی سطح پر عملی اقدامات، ملیریا کے خاتمے اور قابل علاج بیماری کے خلاف جنگ میں آخری حد تک جانے کے عزم کی تجدید کا دن ہے۔
اس سال کا تھیم – "ملیریا کو ختم کرنا ہے: سرمایہ کاری ، مزید کوششوں اور نئی تحریک سے ” کا مقصد ملیریا کے خاتمے کی جانب پیش رفت کو تیز کرنے کے لئے عالمی پالیسی سے لے کر کمیونٹی ایکشن تک تمام سطحوں پر کوششوں کو از سر نو متحرک کرنا ہے۔
حکومت اور ملکی قیادت، ملیریا کے قومی پروگراموں، اور صحت کے نظام کی اصلاحات و حکمت عملی کے ذریعے، دور دراز علاقوں پہنچنے اور اسے ختم کرنے کے اہداف کو حاصل کرنے کے لئے تیار ہے۔ وزیر اعظم نے ملیریا کے عالمی دن کے موقع پر تمام سٹیک ہولڈرز، حکومت، سول سوسائٹی، ہیلتھ ورکرز اور بین الاقوامی برادری سے اپیل کی کہ وہ متحد ہو کر اس اہم مشن کے لئے کام کریں۔
Short Link: https://urdu.app.com.pk/urdu/?p=587471
