اسلام آباد۔22اپریل (اے پی پی):چیئرمین وزیراعظم یوتھ پروگرام رانا مشہود احمد خان نے کہا ہے کہ حکومت نوجوانوں کو برسر روزگار بنانے کیلئے نیشنل یوتھ ایمپلائمنٹ پالیسی کا جلد اعلان کرے گی، نوجوانوں سمیت مختلف طبقات سے تعلق رکھنے والے افراد کو مرکزی دھارے میں لانے کیلئے نیشنل یوتھ اینڈ ایڈولسنٹ پالیسی پر وسیع تر مشاورت کا عمل جاری ہے۔ ان خیالات کا اظہار انہوں نے منگل کو ”نئی سوچ، نئی راہیں” کے موضوع پر تقریب سے خطاب کرتے ہوئے کیا۔ انہوں نے کہا کہ موجودہ حکومت نے محدود مدت میں ناممکن کو ممکن کر دکھایا ہے، نوجوانوں کو بااختیار بنانے کیلئے تمام وسائل بروئے کار لا کر انہیں سہولیات فراہم کی جا رہی ہیں۔
انہوں نے کہا کہ موجودہ حکومت نے نوجوانوں کے عالمی دن پر یوتھ کنونشن منعقد کیا، دولت مشترکہ یوتھ الائنس کانفرنس منعقد کی گئی، نیشنل یوتھ کونسل تشکیل دی گئی ہے جس میں ملک اور بیرون ملک سے نوجوانوں کے نمائندے شامل ہیں۔ نوجوانوں کو ایک ہی پلیٹ فارم پر سہولیات فراہم کرنے کیلئے ڈیجیٹل یوتھ حب قائم کیا گیا ہے۔ انہوں نے کہا کہ نوجوانوں کو سہولیات دے کر ان کو منفی سے مثبت سرگرمیوں کی طرف راغب کیا گیا ہے۔ حکومت نوجوانوں کو برسر روزگار بنانے کیلئے نیشنل یوتھ ایمپلائمنٹ پالیسی کا جلد اعلان کرے گی۔
نوجوانوں سمیت مختلف طبقات سے تعلق رکھنے والے افراد کو مرکزی دھارے میں لانے کیلئے نیشنل یوتھ اینڈ ایڈولسنٹ پالیسی پر وسیع تر مشاورت کا عمل جاری ہے۔ تمام متعلقہ فریقوں کی مشاورت کے بعد اس پالیسی کا اعلان کیا جائے گا۔ اس پالیسی میں تمام پہلوئوں کا احاطہ کیا جائے گا اور تمام طبقات کو اس میں شامل کیا جائے گا۔ انہوں نے کہا کہ اس پالیسی کی تشکیل میں تمام صوبوں کو شامل کیا جائے گا، تمام وفاقی اور صوبائی کابینہ، قومی و صوبائی اسمبلیوں سے اس کی منظوری لی جائے گی۔ انہوں نے کہا کہ پچاس ملین افراد نے ڈیجیٹل حب تک رسائی حاصل کی ہے، نوجوان اس میں گہری دلچسپی لے رہے ہیں، ہم سب ملکر پاکستان کو خوشحال بنائیں گے۔
پارلیمانی سیکرٹری فرح ناز نے تقریب سے خطاب کرتے ہوئے کہا کہ وزیراعظم یوتھ پروگرام کی ٹیم چیئرمین وزیراعظم یوتھ پروگرام رانا مشہود احمد کی قیادت میں نوجوانوں کو بااختیار بنانے کیلئے دن رات کام کررہی ہے، نوجوان ہمارا اثاثہ ہیں، وہ بیرون ملک جا کر ملک کا مثبت تشخص اجاگر کرنے میں اہم کردار ادا کرینگے۔ رکن قومی اسمبلی نوشین افتخار نے کہا کہ موجودہ حکومت نوجوانوں کو سہولیات فراہم کرنے کیلئے تمام وسائل بروئے کار لا رہی ہے، نوجوانوں کو برسر روزگار بنانا اور اپنے پائوں پر کھڑا کرنا ہماری اولین ترجیح ہے۔
ہر شہری کو ملک کی ترقی کیلئے اپنی ذمہ داری کا احساس کرنا چاہئے۔ نوجوانوں سے متعلق وفاق اور صوبائی حکومتوں کو یکساں پالیسی اپنانی چاہئے۔ مسلم لیگ (ن) کے رہنما انجم عقیل نے کہا کہ رانا مشہود احمد خان کی قیادت میں وزیراعظم یوتھ پروگرام نے محدود مدت میں شاندار کارکردگی کا مظاہرہ کیا ہے، نوجوانوں کو لیپ ٹاپ اور قرضہ سکیم سمیت دیگر پروگراموں کے ذریعے سہولیات فراہم کی جا رہی ہیں۔ نوجوان ملک کا مستقبل روشن کرینگے۔
رکن صوبائی اسمبلی خیبر پختونخوا ملک طارق اعوان نے کہا کہ چیئرمین وزیراعظم یوتھ پروگرام رانا مشہود احمد خان کے دورہ پشاور کے دوران نوجوانوں نے ان پر اعتماد کا اظہار کیا ہے۔ موجودہ حکومت نوجوانوں کو قومی دھارے میں لانے کیلئے وسیع تر مشاورت کر رہی ہے۔ پاکستان میں بوسنیا کے سفیر ایمن کوہو ڈاروچ نے بھی نوجوانوں کو بااختیار بنانے کیلئے کوششوں پر چیئرمین وزیراعظم یوتھ پروگرام رانا مشہود احمد خان کوسراہا اور انہیں ہر ممکن تعاون کا یقین دلایا۔
Short Link: https://urdu.app.com.pk/urdu/?p=586110
