اسلام آباد۔10جون (اے پی پی):وفاقی وزیر صنعت و پیداوار رانا تنویر حسین نے کہا ہے کہ حکومت نےڈیرھ لاکھ میٹرک ٹن چینی برآمد کرنے کی مشروط اجازت دے دی ہے،چینی کے سٹاک کی دستیابی اور قیمتوں میں استحکام کو یقینی بنایا جائےگا۔ ان خیالات کا اظہار انہوں نے پیر کو شوگر ایڈوائزری بورڈ اجلاس کی صدارت کرتے ہوئے کیا۔
حکومت اور پاکستان شوگر ملز ایسوسی ایشن کے درمیان معاہدے پر دستخط کئے گئے ۔رانا تنویر حسین نے کہا کہ حکومت نےایک لاکھ 50 ہزار میٹرک ٹن چینی برآمد کرنے کی مشروط اجازت دیدی ہے، چینی کی دستیابی اور قیمتوں میں استحکام کو یقینی بنایا جائےگا، ایکس ملز چینی کی قیمت میں کسی صورت اضافہ نہیں کیا جائے گا۔
انہوں نے کہا کہ کاشتکاروں کی تمام زیر التوا ادائیگیاں ترجیحی بنیادوں پر کی جائیں گی۔ انہوں نے کہا کہ شوگر ایڈوائزری بورڈ چینی کی قیمتوں اور مارکیٹ کے استحکام کا 15روز میں دوبارہ جائزہ لے گا۔ وفاقی وزیر نے کہا کہ مستقبل میں چینی کی برآمد کا آپشن ملک میں قیمتوں کے استحکام اور سٹاک کی دستیابی سے منسلک ہوگا۔
