نارووال۔ 12 جون (اے پی پی):ڈپٹی کمشنر نارووال سید حسن رضا نے کہا ہے کہ وزیر اعلی پنجاب مریم نواز شریف کی قیادت میں حکومت پنجاب نے پہلے 100دن میں کامیابیوں کی بنیاد رکھ دی ہے، ہر شعبہ میں حکومتی اقدامات سے شہریوں کو ریلیف ملا ہے۔ ان خیالات کا اظہار انہوں نے میڈیا سے گفتگو کرتے ہوئے کیا ۔ انکا کہنا تھا کہ26فروری کو اقتدار سنبھالنے کے ساتھ ہی موجودہ حکومت کیلئے سب سے پہلا چیلنج ماہ رمضان المبارک میں مہنگائی کی چکی میں پسی ہوئی عوام کو ریلیف دینا تھا جس کیلئے وزیراعلی پنجاب مریم نواز کی زیر قیادت نگہبان رمضان پیکج لانچ کیا گیا جس کے تحت صوبہ میں 65لاکھ گھرانے کے ساڑھے تین کروڑ افراد کو سبزی،پھل،انڈے،گوشت اور آٹا سمیت دیگر اشیاء ضروریہ انتہائی سستے دامون مہیا کی گئیں ،امیر اور غریب کی تقسیم کے بغیر شہریوں نے اس پروگرام سےخوب استفادہ حاصل کیا۔وزیراعلی پنجاب کے ویژن کے مطابق پہلی مرتبہ شہری آبادیوں کے ساتھ ساتھ دیہی آبادیوں میں بھی صفائی ستھرائی کے انتظامات سمیت دیگر میونسپل سروسز کی فراہمی کے حوالے سے ستھرا پنجاب مہم کا آغاز کیا گیا
جس میں اربن ایریاز کیساتھ دیہی علاقوں میں صفائی پر بھی یکساں توجہ دی جارہی ہے، صوبے میں سالڈ ویسٹ مینجمنٹ کے نظام کو جدید خطوط پر استوار کرنے اور جامع بلدیاتی نظام کے قیام کیلئے وزیر اعلی پنجاب کے ویژن کے مطابق کام جاری ہے۔انہوں نے کہا کہ صوبائی حکومت کیلئے مہنگائی بہت بڑا چیلنج تھی جس میں کمی کرنا حکومت وقت کی اہم ترین ضرورت تھی ،موجودہ حکومت کی بہتر حکمت عملی کے نتیجے میں صوبہ بھر میں سبزی،دالوں اور مختلف اشیاءخرونوش کی قیمتوں میں خاطر خواہ کمی دیکھنے میں آئی ہے، گندم کی قیمت میں کمی کا فائدہ روٹی، نان، بیکری آئٹمز کی قیمتوں میں کمی کی صورت میں عوام تک پہنچایا گیا ہے
کاشتکاروں کیلئے 400 ارب روپے کے تاریخی پیکج کا اعلان کیا گیا ہے ،اس پروگرام کے تحت کسانوں کو ان کی ضروریات کے مطابق بیج، کھادیں، اور تمام زرعی ادویات و آلات ایک چھت کے نیچے دستیاب کی جائیں گی۔انہوں نے کہا کہ حکومت پنجاب نے 40 ارب روپے سے دیہی مراکز صحت (RHCs) اور بنیادی مراکز صحت (BHUs) میں میڈیکل آلات کی دستیابی، عدم دستیاب سہولیات کی فراہمی اور صفائی اور مرمت کے جامع پروگرام کا آغاز کیا ، کلینک آن ویل پروگرام سے زچہ بچہ سمیت دیہی علاقوں میں صحت کی سہولیات مریم نواز حکومت کی کامیابی ہے۔انہوں نے کہا کہ وزیر اعلی پنجاب مریم نواز شریف نے 3 ماہ کے ترقیاتی بجٹ میں 28 منصوبوں میں سے 320 ارب روپے کے 82 سڑکوں اور شاہرات کی تعمیر و مرمت کے منصوبے کے لیے بھی فنڈز مختص کیے گئے جبکہ 10 ارب روپے سے پنجاب روز انفراسٹرکچر پروجیکٹ کے آغاز کو یقینی بنایا گیا، اپنی چھت اپنا گھر پروگرام کے لیے 5 ارب روپے، الیکٹرک بسوں کے لیے 2 ارب اور الیکٹرک بائیکس کے لیے 1 ارب روپے کی گنجائش پیدا کی گئی۔ وزیر اعلی پنجاب مریم نواز شریف نے بلدیاتی نظام کے ذریعے دیہی اور شہری علاقوں میں میونسپل سروسز کی مساوی سہولیات کی فراہمی اور سالڈ ویسٹ مینجمنٹ کو آئوٹ سورس کرنے کیلئے نیا بلدیاتی نظام ترتیب دیا ہے جس سے بلاشبہ صوبے کی عوام کا معیار زندگی بہتر بنانے میں مدد ملے گی۔
Short Link: https://urdu.app.com.pk/urdu/?p=475481
