اسلام آباد۔12اگست (اے پی پی):وفاقی وزیر ریلوے محمد حنیف عباسی نے کہا ہے کہ حکومتِ پاکستان کا عزم نوجوانوں کو بااختیار بنا کر پاکستان کو مضبوط کرنا ہے،پاکستان کا ہر نوجوان کامیابی اور خوشحالی کا سفیر ہے۔ ان خیالات کا اظہار انہوں نے منگل کو نوجوانوں کے عالمی د ن کے موقع پر اپنے پیغام میں کیا۔ انہوں نے کہا کہ نوجوان پاکستان کا سب سے قیمتی سرمایہ ہیں،پاکستان کی خوشحالی اور استحکام کا راز باہمت اور باصلاحیت نوجوان ہیں،حکومتِ پاکستان کا عزم نوجوانوں کو بااختیار بنا کر پاکستان کو مضبوط کرنا ہے۔
وزیر ریلوے نے کہا کہ وزیرِاعظم پاکستان کا وژن ہر نوجوان کو تعلیم، روزگار اور مہارت کے مواقع فراہم کرنا ہے،اسکلز ڈویلپمنٹ، اسٹارٹ اپس اور ٹیکنالوجی سمیت نوجوانوں کے لیے حکومت کے بڑے منصوبے جاری ہیں ،پاکستان ریلوےنوجوانوں کے ساتھ ترقی کی پٹڑی پر شانہ بشانہ گامزن ہے۔
انہوں نے کہا کہ پاکستان ریلوے ان باہمت جوانوں کو خراجِ تحسین پیش کرتا ہے جو قوم کی ترقی کے سفر کا اصل محور ہیں،پاکستان کا ہر نوجوان کامیابی اور خوشحالی کا سفیر ہے،حکومتِ پاکستان کا مقصد نوجوانوں کے خوابوں کو حقیقت میں بدلنا اور پاکستان کو ترقی کی بلندیوں پر پہنچانا ہے۔
