اسلام آباد ۔ 24 مارچ (اے پی پی)وفاقی وزیر دا خلہ اعجاز احمد شاہ نے کہا ہے کہ حکومت کرونا وائرس کی روک تھام کے لئے ہر ممکن اقدامات کر رہی ہے، وزیر اعظم عمران خان خود ساری صورتحال کا جائزہ لے رہے ہیں۔منگل کو وزارت داخلہ سے جاری بیان کے مطابق وزیر داخلہ نے کہا کہ عوام کے بھرپور تعاون کے بغیر کرونا وائرس کے خلاف جنگ جیتی نہیں جا سکتی، لوگ احتیاطی تدابیر اپنا کر نہ صرف اپنے آپ کو بلکہ دوسروں کی زندگیوں کو محفوظ بنا سکتے ہیں۔ اعجازشاہ نے کہا کہ پاکستان میں صورتحال کئی ممالک سے بہتر ہے جس کو مزید بہتر بنانے کے لئے تمام وسائل بروئے کار لائے جا رہے ہیں۔انہوں نے عوام سے اپیل کی کہ اپنے گھروں میں رہیں اور غیر ضروری سفر سے پرہیز کریں، پر ہجوم جگہوں پر ہر گز نہ جائیں اور اپنے ہاتھ 20 سیکنڈز تک اچھی طرح دھوئیں، صرف احتیاطی تدابیر پر عمل کر کے ہی اس خطر ناک وائرس سے بچا جا سکتا ہے۔وزیر داخلہ نے کہا کہ انشاء اللہ کرونا وائرس کے خلاف جنگ ہم ضرور جیتیں گے۔
