اسلام آباد۔28اگست (اے پی پی):آئل اینڈ گیس ریگولیٹری اتھارٹی (اوگرا)نے تمام لائسنس یافتہ اداروں کو ہدایت کی ہے کہ حکومت کے کیش لیس اکانومی کے فروغ کے وژن کے مطابق ڈیجیٹل ادائیگی کے حل کو اپنائیں۔ترجمان اوگرا نے کہا ہے کہ اوگرا نے زیر انتظام اداروں ہدایات جاری کرتے ہوئے پابند کیا ہے کہ اپنے آؤٹ لیٹس (بشمول آئل، گیس، سی این جی، ایل پی جی، ایل این جی، آر ایل این جی، ریفائنری، لبرکیٹس وغیرہ) پر ڈیجیٹل پیمنٹ بالخصوص راست کیو آر کوڈ کو اپنانے اور نمایاں طور پر آویزاں کریں۔ان ہدایات کی تعمیل کے لئے 31 اکتوبر 2025 تک کی ڈیڈ لائن مقرر کرتے ہوئے اس بات پر زور دیا گیا ہے کہ کسی بھی کمپنی کو ان صارفین کو جو ڈیجیٹل لین دین کرنا چاہیں کو انکار کرنے کی اجازت نہیں دی جائے گی۔
یہ اقدام نہ صرف صارفین کو سہولت فراہم کرے گا بلکہ پاکستان کے ڈیجیٹل ادائیگی کے نظام کو بھی مضبوط کرے گا ۔ ترجمان اوگرا نے مزید کہا کہ یہ اقدام سٹیٹ بینک کی ڈیجیٹائزیشن مہم کی حمایت کرتا ہے اور توقع کی جاتی ہے کہ یہ اقدام نہ صرف مالی شمولیت بڑھائے گا بلکہ ریگولیٹڈ شعبوں میں شفافیت، سہولت اور کاروباری مؤثر عمل کو بھی بہتر کرے گا۔ تمام سٹیک ہولڈرز اپنی متعلقہ بینکوں /ایم ایف بی /ای ایم آئیز کے ساتھ فعال طور پر تعاون کریں تاکہ اپنا مفت راست کیو آر کوڈ حاصل کر سکیں اور وقت پر اس عملدرآمد کو بھی یقینی بنائیں۔
