خاتون اول بیگم محمودہ ممنون حسین کا طالبات سے خطاب

اسلام آباد ۔ 5 دسمبر (اے پی پی) خاتون اول بیگم محمودہ ممنون حسین نے کہا ہے کہ خاندان کے بڑوں اور بزرگوں کی یہ ذمہ داری ہے کہ وہ نئی نسل اورخاص طور پر اپنے بچوں کو آنے والے دور کے تقاضوں سے آگاہ کریں اور مستقبل میں ان پر جو ذمہ داریاں عائد ہوتی ہیں ان کےلئے انہیں تیار کریں، والدین اور اساتذہ کی یہ مشترکہ ذمہ داری ہے کہ وہ اپنے بچوںاور بچیوں کو زمانے کی اونچ نیچ اور ذمہ داریوں سے آگاہ کریں۔ انہوں نے یہ بات پیر کو ایوان صدر میں سکول کی طالبات سے خطاب کرتے ہوئے کہی جس میں طالبات اور اساتذہ کی ایک بڑی تعداد شریک تھی۔ خاتون اول نے کہا حضوراکرم نے تعلیم کا حصول ہر مسلمان مرد اور عورت پر فرض قرار دیا ہے۔ مردوں کےلئے تعلیم کا حصول اس لئے ضروری ہے تاکہ اس کی روشنی سے دنیا کو ہر قسم کے ظلم اور ناانصافی سے پاک کرکے امن کا گہوارہ بنا دیا جائے اور عورتوں پر علم کا حصول اس لئے فرض کیا گیا کہ وہ آنے والی نسلوں کی اچھی تربیت کرکے اس نیک کام میں حصہ داربن جائیں۔ انہوں نے طالبات کو مخاطب کرتے ہوئے کہا کہ آنے والے دنوں میں ان پر جو ذمہ داریاں عائد ہونے والی ہیں، انہیں سمجھنے کی کوشش کریں۔ اس سلسلہ میں اپنے والدین اور بڑوں کی نصیحت اور رہنمائی پر توجہ دیں۔ قرآن اور حدیث کے ساتھ ساتھ اچھا لٹریچر پڑھیں۔ اپنی تعلیم پر پوری توجہ دیں اور اپنے گھر کے ماحول میں ایک ایسا کردار ادا کریں جس سے محبت اور اخلاص کی فضاءکو تقویت ملے۔

Short Link: https://urdu.app.com.pk/urdu/?p=32085