اسلام آباد ۔ 29 دسمبر (اے پی پی) خزانہ ڈویژن کے ترجمان نے میڈیا کے کچھ سیکشنز میں چلنے والی خبر ”پاکستان نے آئندہ 6 ماہ کے دوران غیر ملکی قرضے کی مد میں 6 ارب ڈالر کی ادائیگی کرنی ہے“ ،کی وضاحت کرتے ہوئے کہا ہے کہ رواں مالی سال 2017-18ءکے دوران غیر ملکی قرضے کے طور پر 6 ارب ڈالر ادا کرنے تھے، جن میں سے 2 ارب 40 کروڑ روپے ادا کر دیئے گئے ہیں جبکہ حکومت پاکستان نے رواں مالی سال کے باقی عرصہ کے دوران 3 ارب 60 کروڑ روپے کی ادائیگی کرنی ہے۔ ترجمان نے مزید وضاحت کرتے ہوئے کہا ہے کہ سال 2022ءتک پاکستان سالانہ غیر ملکی قرضے کی ادائیگی 5 ارب سے زیادہ نہیں ہے اور یہ سالانہ ادائیگی پاکستان کے سابقہ ٹریک ریکارڈ کے مطابق کسی تشویش کا باعث نہیں ہے کیونکہ پاکستان میں ماضی میں غیر ملکی قرضے کی بڑی بڑی ادائیگیاں بھی کی ہیں۔
