لاہور۔7جولائی (اے پی پی):صوبائی وزیر صحت خواجہ سلمان رفیق کی زیر صدارت محکمہ سپیشلائزڈ ہیلتھ کیئر اینڈ میڈیکل ایجوکیشن میں سیکرٹری صحت پنجاب عظمت محمود خان کے ہمراہ اجلاس منعقد ہوا۔اجلاس میں سپیشل سیکرٹری آپریشنز طارق محمود رحمانی، چیف پلاننگ آفیسر عبدالحق بھٹی، ایڈیشنل سیکرٹری ڈویلپمنٹ ڈاکٹر وحید اصغر و دیگر افسران نے شرکت کی۔
صوبائی وزیر صحت نے اجلاس کے دوران سید احمد حسین گورنمنٹ جنرل کم ٹی بی ہسپتال مری، ساہیوال انسٹیٹیوٹ آف کارڈیالوجی اور نواز شریف انسٹیٹیوٹ آف کارڈیالوجی سرگودھا پر جاری پیش رفت کا جائزہ لیا۔چیف پلاننگ آفیسر اور ان کی ٹیم نے جاری پیش رفت بارے بریفنگ بھی دی۔صوبائی وزیرنے کہاکہ وزیر اعلیٰ کے وژن کے مطابق عوام کو ان کی دہلیز پر صحت کی بہترین سہولیات کی فراہمی ہماری اولین ترجیح ہے۔سید احمد حسین گورنمنٹ جنرل کم ٹی بی ہسپتال مری، ساہیوال انسٹیٹیوٹ آف کارڈیالوجی اور نواز شریف انسٹیٹیوٹ آف کارڈیالوجی سرگودھا پر جاری پیش رفت تسلی بخش ہے۔خواجہ سلمان رفیق نے کہاکہ ساہیوال انسٹیٹیوٹ آف کارڈیالوجی کو 31 اگست تک عوام کیلئے کھول دیا جائے گا۔
ساہیوال انسٹیٹیوٹ آف کارڈیالوجی میں 2 نئی کیتھ لیبز قائم کی جائیں گی۔ نواز شریف انسٹی ٹیوٹ آف کارڈیالوجی سرگودھا پر برق رفتاری سے کام جاری ہے۔ صوبائی وزیر صحت خواجہ سلمان رفیق نے سید احمد حسین گورنمنٹ جنرل کم ٹی بی ہسپتال مری میں جاری کام کو جلد مکمل کرنے کی ہدایت کی۔وڈیو لنک کے ذریعے ایم ایس سید احمد حسین گورنمنٹ جنرل کم ٹی بی ہسپتال مری کے ایم ایس ڈاکٹر قیصر عباسی، پرنسپل سرگودھا میڈیکل کالج پروفیسر وارث فاروقہ، ایگزیکٹو ڈائریکٹر ملتان انسٹی ٹیوٹ آف کارڈیالوجی پروفیسر مجتبی صدیقی و دیگر نے شرکت کی۔
