پشاور۔ 18 مارچ (اے پی پی):وزیر اعلی خیبر پختونخوا علی امین گنڈاپور کی زیر صدارت پولیس سے متعلق اہم اجلاس منعقد ہوا، اجلاس میں خیبرپختونخوا پولیس اہلکاروں کی تنخواہیں پنجاب کے برابر کرنے کا اصولی فیصلہ کیا گیا ہے۔
وزیر اعلی خیبر پختونخوا کی زیر صدارت پولیس سے متعلق ہونے والے اہم اجلاس میں چیف سیکرٹری، آئی جی پولیس، ایڈیشنل چیف سیکرٹری داخلہ کے علاوہ محکمہ خزانہ اور پولیس کے اعلی حکام نے شرکت کی صوبے میں پولیس کو مستحکم کرنے کے لئے وزیر اعلی کی جانب مختلف اقدامات اٹھائے گئے، جن میں پولیس کی مختلف ضروریات پوری کرنے کے لئے ساڑھے 5 ارب روپے اور پولیس گاڑیوں کی بلٹ پروفنگ اور دیگر جدید آلات کی خریداری کے لئے تین ارب روپے فوری جاری کرنے کا فیصلہ ہوا ہے ۔
اجلاس میں ہر ضلع کی سطح پر جدید آلات سے لیس سپیشل ویپن اینڈ ٹیکنیک ٹیمیں بنانے کا بھی فیصلہ کیا گیا، پولیس تھانوں اور چیک پوسٹوں کو محفوظ بنانے کے لئے 1 اعشاریہ 3 ارب روپے فراہم کرنے سمیت سالانہ ترقیاتی پروگرام میں شامل تھانوں اور چیک پوسٹوں کی تعمیر کے باقی ماندہ منصوبوں کے لئے 500 ملین روپے جاری کر دیئے گئے ہیں۔
اجلاس میں پولیس کے لئے نائٹ وژن گاگلز، سنائپرز اور دیگر آلات کے لئے 720 ملین روپے بھی جاری کرنے کا فیصلہ ہوا ہے، اس کے علاوہ وزیر اعلی خیبرپختونخوا کی جانب سے پولیس اہلکاروں اور افسران کے لئے ایک اور اہم اقدام اٹھایا گیا ہے، جس کے تحت خیبرپختونخوا پولیس اہلکاروں کی تنخواہیں پنجاب کے برابر کرنے کا اصولی فیصلہ کیا گیا ہے۔ اجلاس میں بریفنگ دیتے ہوئے وزیراعلیٰ کو بتایا گیا کہ بلوچستان میں پولیس افسران کی تنخواہیں دیگر تمام صوبوں جبکہ پنجاب میں پولیس اہلکاروں کی تنخواہوں دیگر تمام صوبوں سے زیادہ ہیں۔
علی امین گنڈاپور کا کہنا تھا کہ امن و امان کا قیام موجود صوبائی حکومت کی سب سے اہم ترجیح ہے، صوبے میں امن و امان کی موجودہ صورتحال کے پیش نظر پولیس کو ہر لحاظ سے مستحکم کرنا ناگزیر ہے، موجودہ صوبائی حکومت شروع دن ہی سے پولیس کو مستحکم بنانے کے لئے خطیر وسائل خرچ کر رہی ہے۔
وزیراعلیٰ خیبر پختون خوا نے کہا کہ پولیس کی ضروریات پوری کرنے کے لئے ترجیحی بنیادوں پر فنڈز فراہم کئے جائیں گے، پولیس کو سکیورٹی کے موجودہ چیلنجز سے نمٹنے کے قابل بنانا ہمارے لئے سب سے مقدم ہے، اس پر کوئی سمجھوتہ نہیں کیا جائے گا، خیبر پختونخوا پولیس انتہائی جوانمردی سے دہشتگردی کا مقابلہ کر رہی ہے، ہمیں پولیس کی کارکردگی اور پولیس جوانوں کی قربانیوں پر فخر ہے۔
انہوں نے مزید کہا کہ صوبائی حکومت پولیس کی ضرورت پوری کرنے میں وسائل کی کمی کو رکاوٹ نہیں بننے دے گی۔
Short Link: https://urdu.app.com.pk/urdu/?p=573777
