خیبر پختونخوا میں پولیو مہم چوتھے روز بھی جاری رہی،عبدالباسط

پشاور۔27جنوری (اے پی پی):پشاورسمیت خیبرپختو نخوا کے اضلاع ،مردان، صوابی،چارسدہ ،کوہاٹ، دیرلوئراورباجوڑمیں جمعرات کے روز پانچ روزہ پولیو مہم چوتھے روز بھی جاری رہی۔کوآرڈینیٹر ایمرجنسی آپریشن سینٹرز خیبرپختونخوا عبدالباسط کے مطابق مہم میں20ہزار 484ٹیمیں مصروف عمل ہیں جن میں 18ہزار 324موبائل، 1ہزار237فکسڈ، 856ٹرانزٹ اور 67رومنگ ٹیمیں شامل ہیں، مہم کی موثر نگرانی کے لئے 4ہزار 949ایریا انچارج کی تعیناتی کی گئی ہے۔

واضح رہے کہ مہم کے پہلے مرحلے میں 6جنوبی اضلاع بنوں، لکی مروت، ٹانک، ڈی آئی خان، شمالی وزیرستان اور جنوبی وزیرستان میں چلائی گئی جبکہ دوسرے مرحلے میں پشاور، مردان، صوابی ، چارسدہ، کوہاٹ ڈویژن،دیر لوئراور باجوڑ میں پولیو مہم جارہی ہے اور دونوں مراحل کے دوران 44لاکھ 76ہزار سے زیادہ بچوں کو پولیو قطرے پلانے کا ہدف رکھا گیا ہے۔

Short Link: https://urdu.app.com.pk/urdu/?p=292576