پشاور۔ 12 اپریل (اے پی پی):خیبر پختونخوا میں 14 سے 18 اپریل تک گرمی کی شدت میں اضافے کا امکان ہے۔ پرونشل ڈیزاسٹر مینجمنٹ اتھارٹی (پی ڈی ایم اے) کی جانب سے جاری مراسلہ کے مطابق 14 سے 18 اپریل تک صوبے کے بعض حصوں میں دوپہر اور رات کے اوقات میں موسم گرم رہنے کے ساتھ گرد آلود ہوائیں چلنے کا بھی امکان ہے۔ صوبے کے بیشتر علاقوں میں پیر کو دن کے وقت درجہ حرارت میں بتدریج اضافے کا امکان ہے۔ دن کے اوقات میں 4 سے 6 ڈگری سنٹی گریڈ اضافے کا امکان ہے۔ پی ڈی ایم اے کی جانب سے ضلعی انتظامیہ اور متعلقہ اداروں کو جاری مراسلہ میں کہا گیا ہے کہ گرمی اور خشک موسمی حالات سے ہیٹ سٹروک اور آبی ذخائر پر پانی کے دباؤ کا سبب بن سکتے ہیں۔
کسان فصلوں کےلیے پانی کا مناسب انتظام کریں۔عوام سورج کی روشنی میں باہر نکلتے ہوئے احتیاطی تدابیر اختیار کریں۔ عوامی آگاہی مہم کے ذریعے عوام کو گرمی کی لہر سے باخبر رکھا جائے، بزرگ اور بچے صبح 10 سے شام پانچ بجے کے اوقات میں براہ راست سورج میں نہ نکلے۔ہیلتھ/میڈیکل سروسز، پیرا میڈیکس اور ریسکیو ڈیپارٹمنٹ کو الرٹ اور ہیٹ سٹروک سینٹر کو برقرار رکھنے کی ہدایت کی جائے۔
مویشیوں اور پالتو جانوروں کی ضروریات کا خاص خیال رکھیں۔تمام متعلقہ ادارے ہنگامی صورت حال سے نمٹنے کے لیے الرٹ رہیں۔ عوام سفر سے پہلے اپنی گاڑی کے انجن میں پانی اور ٹائروں میں پریشر چیک کریں،پی ڈی ایم اے کا ایمرجنسی آپریشن سنٹر مکمل فعال ہے، عوام کسی بھی نا خوشگوار واقعے کی اطلاع ہیلپ لائن 1700 پر دیں۔
Short Link: https://urdu.app.com.pk/urdu/?p=580955
