ابو ظہبی۔17مارچ (اے پی پی):متحدہ عرب امارات میں دبئی پولیس نے رمضان کے پہلے عشرے کے دوران 33 گداگروں کو گرفتار کیا ہے۔ اردو نیوز کے مطابق حکام نے کہا ہے کہ رمضان المبارک کے دوران گداگری کی روک تھام کے لئے کاررواوئیوں کو تیز کرتے ہوئے ایک جامع سکیورٹی پلان بنایا گیا ہے، ان علاقوں میں گشت بڑھادیا گیا جہاں گداگروں کی موجودگی کا امکان ہے۔
دبئی میں انسداد گداگری مہم کے دوران مختلف قومیتوں سے تعلق رکھنے والے افراد کو حراست میں لیا گیا۔ اس سے قبل دبئی پولیس نے گداگروں کے خلاف مہم کے دوران رمضان کے پہلے دن 9 افراد کو گرفتار کیا تھا، ان میں چار خواتین شامل ہیں۔ یاد رہے کہ متحدہ عرب امارات میں گداگری ایک جرم ہے، جس کی سزا 5 ہزار درہم جرمانہ اور تین ماہ تک قید کی سزا ہے۔
گداگری کے لئےگداگروں کے گروپوں کو منظم کرنے یا امارات سے باہر بھرتی میں ملوث افراد کو چھ ماہ قید اور ایک لاکھ درہم جرمانے کا سامنا کرنا پڑ سکتا ہے۔علاوہ ازیں اجازت نامے کے بغیر فنڈ جمع کرنے پر پانچ لاکھ درہم تک جرمانہ ہو سکتا ہے۔
Short Link: https://urdu.app.com.pk/urdu/?p=573347
