اسلام آباد۔13اپریل (اے پی پی):گرمی کی لہر میں اضافہ کے ساتھ گنے کے رس، قلفی، آئس کریم اور ٹھنڈے مشروبات کی مانگ میں اضافہ ہو گیا ، جگہ جگہ سٹالز لگ گئے۔ اے پی پی کے سروے نتائج کے مطابق گرمی کو شکست دینے کے لئے عوام کی کثیر تعداد ٹھنڈے مشروبات سے استفادہ کر رہی ہے جس سے کاروبار دگنا ہو گیا ہے۔ اس حوالہ سے ایک دکاندار نے کہا کہ حالیہ دنوں میں ہمارے کاروبار میں نمایاں اضافہ ہوا ہے۔ دوسری جانب ایک گاہک نے کہا کہ گرمی کو ٹھنڈی آئس کریم کی طرح کوئی اور چیز شکست نہیں دے سکتی۔ طلب میں اضافے سے دکاندار بہت پرجوش ہیں کیونکہ ہیٹ ویو شروع ہونے کے بعد سے ٹھنڈے مشروبات اور آئس کریم کی فروخت دگنی ہوگئی ہے۔
سڑکو ں پر جگہ جگہ دکانداروں کی آوازیں آ تی ہیں اور ان کی ٹھنڈک سے لطف اندوز ہونے والے لوگ بھی سٹالز پر خوش گپیوں میں مصروف نظر آتے ہیں۔ رپورٹ کے مطابق آئس کریم کی فروخت میں اضافہ دکانداروں کے لیےایک خوش آئند عنصر ہے، جو اپنے کاروبار میں اضافہ کے لیے گرمیوں کے موسم پر انحصار کرتے ہیں۔موسم گرما کے تازہ مشروبات میں لیموں و پانی، گنے کا تازہ رس اور ٹھنڈی لسی بیچنے والے گلی کوچوں میں بڑے بڑے دفاتر اور عمارتوں کے قریب ہر جگہ نظر آتے ہیں ۔
