پشاور۔ 19 مئی (اے پی پی):وزیر اعلیٰ خیبرپختونخوا کے معاون خصوصی برائے جنگلات، ماحولیات، جنگلی حیات و موسمیاتی تبدیلی پیر مصور خان نے کہا ہے کہ جبن درگئی کے پرائیویٹ اور دشوار گزار پہاڑی علاقے میں لگی آگ پر قابو پانے کے لئے محکمہ جنگلات، ریسکیو اور مقامی لوگوں کے ساتھ ملکر کوششیں کررہا ہے۔ یہاں سے جاری ایک بیان میں انہوں نے کہا کہ ملاکنڈ کے پہاڑی علاقوں آلہ ڈھنڈ، چڑت اور گونیار میں لگی آگ کو ہفتہ کے روز ہی بجھا دیا گیا تھا
جبن درگئی کے حوالے سے بات کرتے ہوئے انہوں نے کہا کہ محکمہ جنگلات ملاکنڈ ڈویژن، لوئر سوات، پیٹرول سکواڈ، محکمہ جنگلی حیات کے تمام سینئر افسران اور اہلکار وہاں موجود ہیں اور ریسکیو آپریشن میں بھرپور حصہ لے رہے ہیں، انہوں نے عوام سے اپیل کی کہ جنگلات کے تحفظ میں حکومت کا ساتھ دیں کیونکہ جنگلات ہی ہماری بقا کی ضمانت ہیں، یہی وجہ ہے کہ شروع دن سے جنگلات کا فروغ اور تحفظ صوبائی حکومت کی اولین ترجیح رہی ہے،
پیر مصور خان نے محکمہ جنگلات اور ریسکیو 1122 کے اہلکاروں اور مقامی لوگوں کی کوششوں کو سراہاتے ہوئے کہا کہ صوبے میں جنگلات کے تحفظ کے لئے تمام ممکن اقدامات اٹھائے جارہے ہیں۔
Short Link: https://urdu.app.com.pk/urdu/?p=598974
