دریائے ستلج میں طغیانی سے متاثرہ اضلاع میں پی ڈی ایم اے کا ریلیف آپریشن جاری

لاہور۔11ستمبر (اے پی پی):دریائے ستلج میں طغیانی سے متاثرہ اضلاع میں پی ڈی ایم اے کا ریلیف آپریشن جاری ہیں۔ترجمان پی ڈی ایم اے کے مطابق دریائے ستلج میں سیلاب سے 595دیہات متاثر ہوئے جن میں سے 145دیہاتوں میں کاروبار زندگی مکمل طور پر بحال ہو چکے ہیں۔ ڈی جی پی ڈی ایم اے عمران قریشی کا کہنا تھا کہ متاثرہ اضلاع میں 236 کشتیوں کے ذریعے لوگوں کو محفوظ مقامات پر منتقل کر دیا گیا،ریسکیو آپریشن کے لئے ایک ہزار اہلکاروں نے دن رات فرائض منصبی سرانجام دیئے اور تین ہزار سے زائد لائف جیکٹس متاثرہ اضلاع میں تقسیم کی گئیں۔

انہوں نے مزید بتایا کہ متاثرہ اضلاع میں 106میڈیکل کیمپ عوام کی دن رات خدمت میں مگن رہے،ہنگامی صورت حال کے پیش نظر 16 ایمبولینسز متاثرہ علاقوں میں موجود رہیں،55ہزار سے زائد افراد نے حکومتی میڈیکل کیمپوں سے علاج معالجہ کروایا نیز 179ریلیف کیمپس بھی متاثرہ علاقوں میں لگائے گئے۔انہوں نے کہا کہ3لاکھ سے زائد افراد کو سیلابی پانی سے نکال کر محفوظ مقامات پر منتقل کیا گیا، تقریباً ساڑھے پانچ لاکھ افراد کو مجموعی طور پر ریسکیو کیا گیا اور ڈیڑھ لاکھ کے قریب افراد کو پکا ہوا کھانا مہیا کیا گیا جبکہ3لاکھ سے زائد مویشیوں کو محفوظ مقامات پر منتقل کیا گیا۔

انہوں نے مزید بتایا کہ90ہزار کے قریب مویشیوں کا حکومتی کیمپس میں مفت علاج کیا گیا۔ ڈی جی عمران قریشی نے مستقبل کی پلاننگ بارے آگاہ کرتے ہوئے کہا کہ متاثرہ علاقوں کی مکمل بحالی تک امدادی سرگرمیاں جاری رہیں گی ، سیلاب سے متاثرہ علاقوں میں وبائی امراض کی روک تھام کیلئے بھی اقدامات کئے جا رہے ہیں اور متاثرہ علاقوں کی بحالی کیلئے تمام تر وسائل بروئے کار لائے جا رہے ہیں ۔

Short Link: https://urdu.app.com.pk/urdu/?p=389182