لاہور۔18اگست (اے پی پی):ترجمان پراونشل ڈیزاسٹر مینجمنٹ اتھارٹی پنجاب نے جمعہ کو جاری بیان میں بتایا کہ دریائے ستلج میں گنڈا سنگھ والا کے مقام پر درمیانے درجے کا سیلاب ہے جہاں پانی کا بہائو ایک لاکھ 50 ہزار کیوسک تک پہنچ گیا ہے، دریا میں پانی کی سطح مسلسل بلند ہو رہی ہے، آئندہ 24 گھنٹوں کے دوران گنڈا سنگھ والا کے مقام پر اونچے درجے کا سیلاب متوقع ہے۔
ترجمان کا کہنا تھا کہ بھارت کی جانب سے مزید پانی چھوڑے جانے کا بھی خدشہ ہے، سیلاب سے دریائے ستلج سے متصل اضلاع کے نشیبی علاقے زیر آب آنے کا خطرہ ہے، قصور، اوکاڑہ، پاکپتن، بہاولنگر، وہاڑی، لودھراں، ملتان اور بہاولپور کے اضلاع ستلج پر واقع ہیں، دوسری جانب ڈی جی پی ڈی ایم اے عمران قریشی نے متعلقہ اضلاع کی انتظامیہ کو تمام تر انتظامات مکمل کرنے کی ہدایات جاری کر دی ہیں۔
انہوں نے کہا ہے کہ کسی بھی ہنگامی صورتحال سے نمٹنے کے لیے ریسکیو ادارے بھی الرٹ رہیں، کنٹرول روم 24 گھنٹے دریاں کی صورتحال مانیٹر کر رہا ہے، تمام محکمے کسی بھی ہنگامی صورتحال سے نمٹنے کے لیے تیاریاں مکمل رکھیں اور انسانی جانوں کے تحفظ کے لیے بروقت اقدامات یقینی بنائیں، تمام محکمے، ڈویژنل اور ضلعی انتظامیہ آپس میں قریبی رابطہ رکھیں، جبکہ شہری کسی بھی ایمرجنسی کی صورت میں پی ڈی ایم اے کی ہیلپ لائن 1129 پر کال کریں۔
