اسلام آباد۔28اگست (اے پی پی):دریائے چناب، راوی اور ستلج میں غیر معمولی سیلابی صورتحال جاری ہے۔نیشنل ڈیزاسٹر منیجمنٹ(این ڈی ایم اے)کے نیشنل ایمرجنسیز آپریشن سینٹر کے مطابق دریائے چناب میں قادرآباد اور خانکی کے مقامات پر شدید سیلابی صورتحال موجود ہے ،خانکی میں 8لاکھ 59ہزار کیوسک کا شدید بہائو جبکہ قادرآباد میں شدید سیلابی صورتحال کے ساتھ بہائو 9 لاکھ 1 ہزار کیوسک ریکارڈ کیا گیا ہے،
سیلابی ریلے قادر آباد اور خانکی کے بعد ہیڈ تریموں سے گزریں گے،دریائےچناب میں سیلاب کے باعث گجرات، حافظ آباد،پنڈی بھٹیاں،سرگودھا، منڈی بہائوالدین، چنیوٹ اور جھنگ کے علاقے ممکنہ طور پر متاثر ہو سکتے ہیں،دریائے راوی میں جسڑ کے مقام پر 1 لاکھ 39 ہزار کیوسک ریلے کے ساتھ شدید سیلابی صورتحال موجود ہے، شاہدرہ کے مقام پر پہنچتے ہوئے سیلابی ریلا تقریباً 1لاکھ64 ہزار160 کیوسک ہو چکا ہے۔جمعرات کو این ڈی ایم اے کے میڈیا ونگ سے جاری کردہ بیان کے مطابق یہ سیلابی ریلا شاہدرہ اور نارووال کو ممکنہ طور پر متاثر کرے گا،
شاہدرہ کے مقام پرلاہور میں کوٹ منڈو، جیا موسی، عزیز کالونی، قیصر ٹائون، فیصل پارک، ڈھیراور کوٹ بیگم کے علاقے متاثر ہو سکتے ہیں،ضلع شیخوپورہ میں فیض پورکھوہ، دھمیکی، ڈکا، برج اٹاری، کوٹ عبدالمالک جبکہ ضلع ننکانہ صاحب میں گنیش پور کے علاقے ممکنہ طور پر متاثر ہو سکتے ہیں ،ضلع خانیوال میں غوث پور(میاں چنوں)، امیر گڑھ، کوٹ اسلام اور عبدالحکیم کے علاقوں کو بھی سیلابی ریلے متاثر کریں گے،ستلج میں گنڈا سنگھ والا کے مقام پراس وقت تقریباً2لاکھ61ہزارکیوسک سیلابی ریلے کے ساتھ شدید سیلابی صورتحال موجود ہے ،سیلابی ریلے کے باعث گنڈا سنگھ والا کے نشیبی علاقوں میں سلیمانکی میں بھی بہائو میں تیز ی آ چکی ہے جہاں اس وقت تقریباً 1 لاکھ9 ہزارکیوسک بہائو موجود ہے۔
دریائے ستلج میں سیلابی صورحال کے باعث ضلع قصور میں پھول نگر، رکھ خانکے،نتھے خلص، لمبے جاگیر،کوٹ سردار، ہنجارے کلہ-بھٹروالکا اور نوشیرہگائے کے علاقے ممکنہ طور پر متاثر ہو سکتے ہیں ۔ضلع پاک پتن، وہاڑی، ننکانہ صاحب، اوکاڑہ، بہاولنگر میں بھی سیلابی صورتحال متوقع ہے۔یہ بھی کہا گیا ہے کہ وزیراعظم محمد شہباز شریف کی ہدایت پر این ڈی ایم اے تمام ریسکیو و ریلیف سرگرمیاں کی نگرانی کر رہا ہے۔
نیشنل ایمرجنسیز آپریشن سینٹر 24 گھنٹے کے لئے مکمل فعال ہے۔این ڈی ایم اے سول و عسکری اداروں کے ساتھ رابطے میں ہے ۔این ڈی ایم اے نے ہدایت کی ہے کہ دریائوں کے کناروں اورآبی گزرگاہوں کے قریب رہائش پذیر افراد فوری طور پر محفوظ مقامات پر منتقل ہو جائیں۔مقامی انتظامیہ کی ہدایات پر فوری عمل کریں اور ہنگامی حالات میں امدادی ٹیموں سے رابطہ کریں۔ سیلاب زدہ علاقوں میں غیر ضروری سفر سے مکمل گریز کریں۔ ہنگامی کٹ (پانی، خوراک، ادویات) تیار رکھیں اور اہم دستاویزات محفوظ کریں۔مزید رہنمائی کے لیے این ڈی ایم اے ڈیزاسٹر الرٹ ایپ استعمال کریں۔
