ماسکو۔8اگست (اے پی پی):روس کی سلامتی کونسل کے نائب چیئرمین دمتری میدویدوف نے کہا ہے کہ روس کو کرسک ریجن کے ساتھ سرحد پر یوکرینی فوج کی کارروائیوں سے سبق سیکھنے اور دشمن کو سختی سے کچل دینے ضرورت ہے ۔تاس کے مطابق ٹیلی گرام پر جاری بیان میں انہوں نے کہا کہ ہمیں وہی کرنا چاہیے جو چیف آف جنرل اسٹاف ویلری گیراسیموف نے سپریم کمانڈر انچیف سے کرنے کا وعدہ کیا تھا، یعنی دشمن کو پوری طرح کچل کر ان کو شکست دینی چاہیے۔
انہوں نے کہا کہ یوکرینی فوج نے کرسک ریجن میں حالیہ کارروائی روس کے خلاف بہتر فوجی صلاحیت کا مظاہرہ کرکے مغرب سے مزید ہتھیار حاصل کرنے کے مقصد سے کی ہے۔ انہوں نے کہا کہ اس صورتحال میں روس کو یوکرین کے حوالے سے اپنے خصوصی فوجی آپریشن کے دائرہ کار کو ملک سے باہر تک لے جانے کی اجازت دینے کی ضرورت ہے۔ یہ دائرہ کار اوڈیسا، خارکوف، دنیپرو،پیٹروسک، نیکولائیف اور یوکرینی دارالحکومت کیف تک اور اس سے بھی آگے تک پھیلایا جانا چاہیے اور اس کواس وقت تک جاری رکھنا چاہیے جب تک روس اس کو روکنا مناسب خیال کرے۔
واضح رہے کہ 6 اگست کو یوکرین نے سرحدی خطہ کرسک پر بڑے حملے کا آغاز کیا ۔ اس حملے کے دوران گولہ باری اور ڈرون حملوں میں 5شہری ہلاک اور چھ بچوں سمیت 31 افراد زخمی ہوئے۔
